Pa elimina e estimulo fiscal lo cuminza cobra BBO, BAVP y BAZV riba importacion di producto

Entrante 1 di Juli 2023

ORANJESTAD (AAN) -- Director di Departamento di Impuesto (DIMP), Luenne Gomes-Pieters a cuminza su presentacion tocante BBO na frontera, expresando cu esaki ta e momento oportuno pa por brinda mas informacion na henter comunidad di Aruba. “DIMP tabata tin diferente sesion cu stakeholders manera Aruba Wholesalers Association, San Nicolas Business Association, Comerciantenan Uni, Aruba Jewelers Association, Bankers Association, unda cu DIMP hunto cu Aduana, a duna informacion detaya riba e parti tecnico con BBO na frontera ta bay funciona”.

El a reitera cu BBO ta conoci na Aruba desde 2007 caba, manera minister a bisa prome, kiermen tin 15 aña caba cu Aruba ta traha cu un sistema di BBO, cual ta relativamente simple, y manera tur hende sa ta un sistema cumulativo, cu ta un desafio den dje.

Gomes-Pieters a señala cu no tin ningun sistema di impuesto indirecto cu ta fout of cu ta bon. Nan ta escogencianan cu paisnan ta haci pa introduci un sistema di impuesto indirecto y di e tempo aya a scoge pa un sistema simple manera esun conoci desde 2007.

E BBO manera henter nos pueblo sa, ta wordo cobra na e empresario. Esaki ta paga BBO, BAVP, BAZV, riba e volumen di benta di producto y servicio di su negoshi, y esaki ta trece cune un estimulo fiscal pa importa productonan directamente di afo.

“Esaki ta algo cu tambe comercio a menciona na momento cu a subi e tasanan di impuesto di 4%, 5%, 6% y nos a mira cu a bin un estimulo fiscal y netamente nos por bisa cu esaki ta crea un disturbio den nos economia”, Luenne Gomes-Pieters a señala.

E estimulo aki ta bira mas fuerte conforme e BBO, BAVP y BAZV su tarifa ta bira mas halto, y ta bin principalmente, door di e aspectonan fiscal di e sistema aki.

E sistema di BBO ta bira cumulativo na momento cu tin mas di un schakel, ora e producto y servicionan ta keda transmiti pa yega na e consumidor, ta cobra BBO, BAVP, BAZV, na cada schakel incluso impuesto cobra na e schakel anterior. “Finalmente, e consumidor na Aruba ta wordo confronta cu un producto cu ademas tin impuesto riba importacion, accijns, tin acumulacion riba BBO, BAVP y BAZV riba dje. Kico e introduccion di BBO na frontera ta bay trece cune? Nos ta mira cu e importacion di producto, mester ta basa primordialmente riba motibonan comercial y no riba estimulo fiscal manera cu ta actualmente” director di DIMP a señala.

Director di DIMP a splica cu pa elimina e estimulo fiscal pa importa productonan directamente di afo, ta deseable pa cuminza cobra e BBO, BAVP, BAZV, riba importacion di producto, entrante 1 di Juli 2023.

{gallery}Pa elimina e estimulo fiscal lo cuminza cobra BBO, BAVP y BAZV riba importacion di producto{/gallery}