Tanchi Esmee a lansa oficialmente e buki ‘Max y e Taki Encanta’

ORANJESTAD (AAN): Oficialmente e yama Esmeralda Tromp-Jacobs, pero tur hende conoce como ‘Tanchi Esmee’.

  E biaha aki e tabata na Scol Basico Washington cu tabata di fiesta pa ricibi invitadonan pa cu lansamento di su buki nobo, ‘Max y e Taki Encanta’.

   Cu sosten di directora di scol Sharin y directora suplente Mirla, a duna chens pa lanza e buki, mirando e hecho cu Max kende ta e personahe den e buki, ta alumno na e scol.

   E buki di Tanchi Esmee ta relata con su nieto Max cu ta un mucha mescos cu tur otro mucha tin su mondi preferi e gusta explora.  Riba un Diasabra a pasa algo magico den su mondi preferi ora el a bay explora den dje.  Elementonan manera solo, biento, secura, y un taki a hunga un rol grandi den su mente creativo pa crea e magia.

   Segun tanchi Esme tur mucha ta biba den nan mundo di fantasia.  Adultonan nunca mester stroba nan di biba nan infancia, pues laga nan mente explora nan propio mundo encanta.

   Un danki special ta bay na Unoca, Setar NV y CMB Bank pa e suport pa por a saca e buki.

Coreccion na Papiamento door di Marlon van der Linde, Gairo Tromp encarga cu ilustracion di e buki, Sheila Werleman a crea e diseño grafico, y buki a wordo imprimi na Panamericana Formas e Impresos na Bogota, Colombia.

   Tanchi Esmee ta gradici Desiree Corea, Liliana Braamskamp-Erasmus, Sahayra de Abreu Ribeiro Kelly pa e contribucion.  Tambe John Francis Jacobs cu a compone y aregla y cu su bos un cancion pa e buki  titula ‘Rakatatin Rakatatan’.  Dani Cruz a traha imagenan AI y Tanchi Esmee mes a edit e video por haye riba Youtube

   Danki na Richard Dabian pa e sceth di e buki pa presente durante di e presentacion y tambe di mes e mata grandi traha cu hopi amor door di Tanchi Esmee.  El a gradici tambe Click Print, tambe MC cu tabata Tio George Winterdaal, y Francis Jacobs cu a mand’e live pa Top 95 y Canal 22.