Trahadornan di Serlimar ta bek awe na trabao
ORANJESTAD (AAN): Diaranson atardi, un grupo di trahadornan di Serlimar cu ta den welga hunto cu representante di Sindicato STA, Diego de Cuba a bay para dilanti di Bestuurskantoor cu e meta di reuni cu e minister encarga, den e caso aki cu Minister Ursell Arends.
Despues cu e accion a cuminsa dialuna madruga, te cu diaranson e trahadornan a keda den accion y esaki na nifica cu recogemento di sushi no a sosode den e dianan aki.
Diego de Cuba a cataloga e reunion cu Minister Arends uno hopi bon, pero el a remarca cu e situacion di Serlimar no ta uno nobo.
Ta conoci cu for di basta tempo tin un situacion serio den e compania aki. El a remarca cu e compania ta awe den un situacion di bancarota.
Entre otro, ta pidi pa instala den un siman un Raad van Toezicht nobo pa asina por bay haci investigacionnan cu mester wordo haci. E ora lo bay bek na mesa pa reuni cu e Raad van Toezicht of gerencia di Serlimar pa sigui atende cu e asunto aki.
Tambe a menciona e aspecto di uniform, mask y 'safety shoes' pa e trahadornan por subi caya y haci nan trabao.
Toch e trahadornan a keda contento cu e reunion cu Minister Arends y a laga sa cu awe nan lo regresa trabao bek.
Banda di esaki a nombra Michael Rasmijn como informador y e lo mantene Minister Arends na altura di tur cos y e plannan cu tin riba mesa pa entre otro cuminsa recauda fondo.
