ORANJESTAD (AAN) – Diaranzon, Minister di Enseñanza Endy Croes, a bolbe referi na e tema di werksternan, di cual el a papia den un conferencia di prensa anterior,
y tambe a trece dilanti e problema di “OAA”, cu ta hopi halto den agenda di enseñanza, y riba cual nan ta trahando den un solucion duradero y sostenible caba.
El a reitera cu pa e problematico aki un Comision a wordo instala y na Bestuurskantoor tabata tin un “kickoff meeting”, den cual tabata representa e Departamento di Finanzas, DRH, DWJZ, CAD, y di SKOA a bin un abogado y dos experto, y Ministerio di Enseñanza a apunta un Hurista y busca un compania externo, un Register Accounting, cu a bira Presidente di e Comision.
Durante e reunion aki unda tur e instancianan a bin hunto e dignatario a pidi pa busca un solucion y enfoca pa trece conseho aden den 30 dia, y ta caminda e mandatario ta purba pa yega na esaki, pero e lo tuma un tiki mas tempo, segun e tin entendi. El a pidi e grupo pa reuni cu hopi frecuencia, pa asina e tres problemanan di SKOA-Gobierno y Gobierno-SKOA por haya solucion sostenible y duradero riba mesa, cu nan por carga moviendo pa dilanti.
Otro problema cu ta hopi halto den agenda di e mandatario ta esun di Openbare Avondleergangen (OAA) cu tin atencion den su totalidad.
Minister Croes a splica cu e tin un team trahando riba esaki y cu a reuni pa tur departamento, un pa un; esta, Directie Onderwijs, Inspectie Onderwijs, y a scucha diferente stakeholders envolvi, y e tin entendi cu ta biniendo un rapport den direccion di su persona, e siman aki.
“Riba esey nos a pone un tiki mas presion pa nos por resolve un poco mas rapido, y nos tin entendi cu prome cu fin di e siman aki, ainda e bureau di minister lo haya e conseho final, despues di a reuni cu tur partido y lo bin cu e conseho con ta e mihor manera pa continua na un manera duradero. Nan ta bay sigui. Mi kier pa tin trankilidad riba e veld aki tambe, pero e manera con OAA tabata colga cu nan kier a pone bao di EPB, a crea tin diferente inkietud interno cu mester a wordo atendi. Nos lo bay resolve esaki dentro di poco, y dune un direccion pa e ta regla di awo y pa semper, cu un sostenibilidad tambe pa futuro” e dignatario a subraya.
