Minister Rocco Tjon, titular di Husticia:
ORANJESTAD (AAN) – Cuminzando e ronda di pregunta, durante e conferencia di prensa cu Minister di Husticia y Asunto Social Rocco Tjon, unda el a felicita e personal di KIA, cu a celebra nan dia y siman di Cuidadornan di Preso, DIARIO a puntra e mandatario, den termino general, con ta bayendo cu e situacion mes den KIA y si tin suficiente personal.
E mandatario a bisa cu e ta un bon pregunta mirando cu ta un reto grandi, cu den tur departamento di husticia tin scarcedad di personal, y esaki ta un hecho.
Pesey, e ta boga pa bin klasnan nobo den cuadro di e retonan financiero cu nan ta confronta cune. Pero na mesun momento, hunto cu e diferente departamentonan, nan ta bezig ta structura diferente di nan procesonan, e manera con e ta conduci e operacionnan pa di e forma ey tambe kizas lo tin mester di menos personal, cu aworaki.
Pues, e ta un combinacion di percura pa emplea mas persona, den cuadro di e retonan financiero, pero di otro banda restructura, ta critico riba bo propio procesonan, pa wak si enberdad tin mester di tanto personal pa e proceso di reorganizacion ta para pe. Esaki no ta conta solamente pa KIA, pero tambe pa Brandweer, Imigracion y Cuerpo Policial. Pues, ta un reto pa henter e cadena di husticia.
