Manera DIARIO a anuncia guera mundial di petroleo ta culmina
*Menos azeta disponibel ta bolbe bira aumento di costo di bida
*Dilanti costa di Aruba Chrevon Mericano na Venezuela di OPEC
ORANJESTAD (AAN) — Informacionnan economico internacional di DIARIO tabata contene for di siman pasa, loke den fin di siman a bira realidad mundial.
E prijs di petroleo cu a causa un shock pa mundo cu a wordo confronta cu inflacion y aumento di prijs di tur articulo, a bolbe subi pa yega cerca di 100 Dollar pa bari, manera cu DIARIO for di fin di siman pasa a adverti.
Costo di bida na 2022 a wordo seriamente afecta pa e forma cu prijs di petroleo a subi den cuadro di e Guera di Ukraine cu DIARIO semper a mustra cu ta un guera di petroleo.
Costo di bida a subi y a causa un inflacion cu tin henter mundo den su gara. Na paisnan grandi, manera paisnan Europeo, companianan di renombre mundial y eventonan grandi ta wordo influencia na forma negativo.
Aumento di prijs a haci bida imposibel pa un parti grandi di mundo y gobernantenan di paisnan liber mester a tuma medidanan pa na forma artificial, baha e peso di inflacion cu a aumenta e grado mundial di pobresa.
Si mundo a pensa cu e ta drenta 2023 cu menos problema social, durante fin di siman a bira e pregunta grandi ora loke DIARIO a anticipa a socede, ora prijs di petroleo a subi pa casi yega cien na momento di prepracion di e articulo aki.
Cu un Guera di Petroleo a drenta su etapa culminante a bira conoci na momento cu dos grupo a forma su mes na mundo.
E grupo cu ta sostene e decision di OPEC cui bendicion di Rusia y e grupo di paisnan cu ta wordo seriamente afecta despues cu nan a tuma medidanan pisa pues pa confronta e aumento enorme di prijsnan.
Pa comprende loke ta pasa actualmente, mester realisa cu e prijs di petroleo ta dicidi pa e resultadonan financiero di companianan mundial.
E problemanan serio di placa cu mundo a enfrenta na 2022, tabata resultado di e forma cu gastonan a subi rond mundo na 2023 rond mundo.
Cu e Guera na Ukraine ta drenta su fase culminante, cada dia ta bira mas pronuncia den informacionnan cu a mustra den fin di siman entre otro, con Rusia a entrega e refineria cu tabata di Mobil, na otro compania.
E aumento di prijs di petroleo a base di decision di e organisacion mundial di productornan di petroleo, OPEC, ta basa riba e hecho cu menos petroleo tin pa bende, mas caro petroleo ta bira.
Scarcedad di petroleo enfrente e pedido mundial halto, a pone prijsnan subi. E decision di paisnan pa entre otro uza reservanan pa asina tin suficiente petroleo riba mercado, tabata uno di e formanan pa pa baha e scarcedad di petroleo y asina baha e prijs di petroleo y tur producto cu ta depende di petroleo.
Cu menos produccion di e paisnan petrolero, mundo ta bolbe na e punto cu menos produccion enfrente e demanda halto, ta bolbe aumenta prijs loke a bira e caso den fin di siman, manera DIARIO a adverti.
Den e situacion nobo, mester tene na consideracion cu ya tabata tin un peliger pa e forma artificial cu a baha prijs di petroleo dor di baha e pedido publico pa azeta.
E reservanan cu a wordo uza pa reemplasa e entrega di parti di paisnan manera Rusia, a baha considerablemente y ya tabata na discusion.
Ayera mundo a wordo parti den dos grupo. OPEC y Rusia y resto di mundo, cu ta bira victima di prijs mas halto di petroleo.
Dilanti costa di Aruba, tension mundial di hasta prome cu Guera di Ukraine ta presenta su mes.
Venezuela ta un miembro di e organisacion mundial di petroleo, OPEC, pues ta sostene e aumento di prijs di petroleo cu lo tin beneficio tambe pa Venezuela.
Kico lo pasa awor cu e compania Mericano, Chevron, estableci na Venezuela?
Un pregunta sumamente importante pa futuro di Venezuela, cu ta depende di decision di Gobierno Mericano.
E ultimo informacionnan cu DIARIO a ricibi riba Chevron y Venezuela ta indica, cu Gobierno Mericano lo no kibra su reglanan y duna permiso na Chevron pa beneficia di e situacion mundial na fabor di e petroleo di Rusia tambe.
Pues esaki ta nifica, si no bini cambio, cu Chevron na Venezuela, lo no por beneficia di e aumento di prijs di petroleo, cu si a beneficia Rusia, e productor grandi di petroleo.
Si e beneficio aki por yuda Putin keda na poder, ta wordo pone na duda sigur despues di incidentenan di fin di siman den cual Ukraine a demostra su forsa y e guera di Ukraine a parce di a drenta un fase nobo!
