Ta un afirmacion cu aunke e sistema por faya mester sigui lucha pa dignidad y bon calidad di bida

Storia di ciudadano señor Alex Solognier:

ORANJESTAD (AAN): E ciudadano señor Alex Solognier a comparti cu DIARIO su trayecto largo y doloroso cu a culmina den e perdida di su pia, y e lucha pa haya un trato medico digno despues di esaki. Tur cos a cuminsa despues di un operacion di rudia. Tres dia despues, el a nota cu algo no tawata bon. Ora cu nan a cera e herida, e drainer a keda paden. Nan a habri e rudia bek pa coregi esaki, pero despues di esey, su condicion a deteriora: dolor, incomodidad y dificultad pa cana. 

El a cambia di medico pa dr. Kuiken, kende a confirma cu no tabata tin solucion na Aruba pa e rudia. Nan a manda Solognier pa Colombia, pero tampoco aya no a logra haya solucion. E rudia a hincha, a yena cu pus y a sigui empeora, apesar di varios intento di tratamento, incluyendo den totalidad cinco operacion na Aruba y Colombia y implantacion di metal, cu su curpa a rechasa. 

Finalmente, bek na Aruba, infeccion a bira asina severo cu a cuminsa cambia color di su pia. E pia tawata tin bacteria. E decision final tabata inevitabel: amputacion. Solognier mes a acepta esaki, pasobra e no tawata mira otro salida. 

Despues di e amputacion, su lucha a sigui cu e uzo di protesis. E adaptacion no a bay facil. E koker (socket) no tawata pas bon, causando presion, herida y dolor constante. Diferente intento cu foam y despues cu un vacuum koker tampoco a logra soluciona e problema. 

E consecuencia: caidanan frecuente. Solognier a dal su cabes varios biaha y no tawata por lanta di su mes. El a indica cu nunca a haya guia adecua pa siña con pa uza e protesis, contrario cu loke el a experencia na Colombia. 

Situacion a bira mas serio ora cu el a ricibi un rudia uza cu e mes mester a haci limpi, pero esaki tambe a faya, causando mas caida y daño fisico. Frustracion a yega su limite ora el a pidi un koker nobo, pero a wordo informa cu e proceso lo dura hopi. Solognier a tuma control di su destino y a bay Colombia riba su propio costo, unda el a logra traha un koker di carbon fiber, segun su expresion, ta uno fantastico. Contrario na esun di Aruba, cu esaki e por a bay den solo cu ne y no tabata yena cu awa y ta slip sali su mes facilmente. 

Sinembargo, e daño ya tawata grandi. Caidanan repetitivo a afecta su heup y schouder. Na Colombia nan a descubri cu su protesis tabata 7 cm cortico, causando postura incorecto y canamento cu dificultad. E presion constante a resulta den kibra di tendon den un schouder, cu despues a wordo opera, pero cu a laga limitacion permanente. Y despues a comproba cu e otro schouder tambe a sufri daño. 

Despues di mas cu tres aña, Solognier ta bisa cu su calidad di bida a bay hopi atras di loke a wordo priminti. E no por move bon, no por cana sigur, y ta biba cu temor constante pa cay. Actividadnan simpel manera subi un stupi ta bira un riesgo grandi.

Un peticion pa mand’e Hulanda pa un protesis nobo a wordo rechasa, aunke segun e, aya tin e solucion cu e mester. “Mi sa cu tin solucion pero no aki,” el a bisa. 

Su historia ta un recordatorio pa otro ciudadano cu ta pasa den un odisea asina, cu yen di mal experiencia, doloroso y cu yen di reto. E ta un afirmacion cu un sistema por faya, pero un hende mester sigui lucha, pasobra dignidad y bon calidad di bida no ta un luho, pero e ta un derecho di cada ciudadano riba nos pais.