Eugene Boderie di Stichting Huize de la Salle:
ORANJESTAD (AAN): Den un entrevista cu DIARIO, Presidente di Stichting Huize de la Salle, señor Eugene Boderie, a elabora riba un proyecto interesante cu nan ta preparando pa aña 2027. Ta trata di un monumento, un buki conmemorativo y documentario di bida di e frèrenan cu a biba na Aruba.
Segun señor Boderie, e frèrenan ta esnan cu mester forma e brug entre pasado y futuro. Nan a duna nos balornan y siñansanan y tabata tin un influencia hopi grandi den nos comunidad, tambe den cultura, musica y deporte. “Nos mester gradici nan pa e hecho cu nan a duna nos e enseñansa y formacion. Nan legado lo keda pa semper”, señor Boderie a expresa.
E proyecto tin un costo di alrededor 495.000 Florin, di cual 350 mil Florin, ta pa cubri e monumento y 25.000 Florin pa cubri e buki conmemorativo, y 75.000 Florin pa cubri e documentario. Tambe a inclui 10% pa gastonan imprevisto.
Pa yega na e fondo y realisacion di e proyecto aki, señor Boderie ta enfatisa, mester di cooperacion di comunidad di Aruba, comercio, profesionalnan, y ciudadanonan cu a yega di topa e frarenan den trayecto di nan bida.
Stichting Huize de la Salle ta den un mision pa busca e fondo aki y lo uza e metodo via internet di ‘Crowdfunding’. Lo manda email cu tur informacion y motivacion pa encurasha hende contribui na e proyecto grandi aki. Tambe lo acerca Cede Aruba y otro instancianan como tambe lo busca fondonan internacionalmente, na Hulanda tambe unda cu tin fondonan pa proyectonan manera esaki. Segun señor Boderie, pa fin di December lo mester tin e fondonan aki hunto pa cuminsa y avansa e proyecto mas lihe posibel.
