FADA ta alerta:
*Mayoria di e productonan di 'vaping' ta contene nicotina
ORANJESTAD (AAN): Hopi hende ta pensa cu e famoso 'vaping' ta algo cu sa bin di diferente sabor manera mangel, fruta, menta y cu nan no tin nicotina. Rulienne Arends, Trahador Preventivo di Fundacion Anti Droga Aruba (FADA) a bisa den entrevista cu DIARIO cu mayoria di e productonan di 'vaping' ta contene nicotina. Kisas un porcentahe un tiki mas abao compara cu un cigaria.
El a agrega cu tin productonan cu tin mesun hopi cu cigaria. Aworaki, lamentablemente, 'vaping' no ta algo ilegal y ta hay'e pa cumpra.
Ya na Aruba esakinan ta wordo bendi na diferente caminda. Tin cierto tiendanan cu ta specificamente cu ta bende 'vaping' cu 'hookah', pero por haya nan tambe pa cumpra na supermercadonan. Nan ta bin di otro forma, pero ta e mesun producto na un prijs hopi mas abao, cu por ehempel, hobennan por cumpra esaki. Tambe te hasta por haya productonan 'fake' riba caya y eynan ta unda e peliger ta mas grandi pasobra no sa ki productonan nan ta bendiendo y no sa di unda precis e 'e-liquids' cu nan ta uza den dje ta bin, Arends a enfatisa.
FADA tabata tin un combersacion riba esaki cu Ministerio di Salud Publico (DVG) pa haci mas pregunta tocante esaki. E tema ta algo cu DVG ta trahando riba dje pa bin cu ne den e ley di tabaco, a indica.
FADA ta preocupa cu e asunto aki di 'vaping'. Nan ta duna e charlanan y tin hobennan cu ta pone atencion. Otronan ta bisa cu nan no tabata sa cu nan ta contene nicotina. Pero ta haya e grupo di hobennan cu no tin ni un tiki interes y no ta worry.
"E ta keda lamentabel pasobra ora nos ta bay duna nan informacion bo ta wak cu nan no ta informa. Bo ta wak cu e gran mayoria no tin ni un idea di e peligernan di 'vaping', Rulienne Arends a remarca.
Merca tin un 'outbreak' pa loke ta infeccionnan di pulmon cu a bin door di e 'e-Cigarettes', e vaping y otro productonan tambe, Rulienne a agrega.
