HONOLULU: Prijs di webo produci na Merca ta sigui subi ainda den 2022. Nan ta dos biaha mas caro compara cu 2021.
Esaki ta poniendo hopi presion riba negoshinan chikito cu mester di nan. Inflacion y otro causa a crea e aumento drastico di prijs e aña aki.
Compara cu Augustus 2021, prijs di webo a subi cu 82%. Na Juli cu a pasa, el a bolbe subi bastante.
Na Augustus, prijs di webo na Merca a subi cu 6.1%, y loke a bin acerca ta cu miles di galiña a wordo mata debi na contagio di Bird-Flu. Esaki ta pone cu awor webo a bira scars, y esey ta pusha e prijs ainda mas halto.
Esaki a pone cu algun famia no por cumpra nan costumbrado caha di 18 webo mas. Awor nan ta resorta na e tradicional caha di 6 webo, y hasta algun caminda ta bende caha di 4 webo aden pa asina toch un famia cu presupuesto limita, por cumpra algo pa nan desayuno.
Pero e siman aki, un potret cu a circula y saca na Hawaii, a demostra cu algun negoshi a hasta cuminza bende awor 2 webo curu, y e prijs pa nan dos hunto ta $2,50. Esaki a pone hopi hende bira furioso.
Algun a pensa cu kizas ta webo ya herbi special pa come cu Ramen. Enberdad e paki ta di plastico ta ya pa esnan herbi caba, pero e negoshi na Hawaii a indica cu nan ta djis 2 webo curu, y como cu ainda no a inventa paki di carton pa 2-webo, nan a dicidi na usa e paki di plastico aki. E prijs ta $2,50 pa nan dos.
Esey nifica, cu 1 webo costa $1,25 na Hawaii. Siendo cu e isla aki ta uno caminda tin hopi galiña los ta cana rond tur caminda.
Na Puerto Rico tambe tin problema cu prijs halto di webo debi cu nan ta importa tur for di Merca. Pa algun aña caba, e produccion local di webo na Puerto Rico a casi stop por completo, como cu e criadornan di galiña no por a competi cu webo barata cu tabata wordo importa for di Florida.
Pero awor cu Florida su webo tambe a bira caro, y cu tin scarcedad enorme na Puerto Rico di webo, a bin nota cu enberdad e criadornan local ta haya hopi falta mes.
