Inspector di IVA, señora Cheryl Rosa-Fingal:
ORANJESTAD (AAN): Inspectie Volksgezondheid Aruba (IVA) ta ricibi y trata kehonan di ciudadanonan relaciona cu e calidad di cuido brinda den casnan di cuido pa adultonan mayor, mientras cu e situacion ta cay bou di su autoridad y supervision.
Cuido di nos adultonan mayor ta un responsabilidad comparti. Sinembargo, garantisa calidad, siguridad y confiansa den e cuido cu nan ta ricibi ta exigi vigilancia constante. Den e contexto aki, IVA ta cumpli cu su rol di supervisa, evalua y, unda ta necesario, actua pa contribui na un sistema di cuido cu ta pone bienestar, dignidad y siguridad di adulto mayor na prome luga.
Den un entrevista cu Matutino DIARIO, Inspector di IVA, señora Cheryl Rosa-Fingal, a splica cu tin diferente manera pa entrega un keho na IVA. Esaki ta importante particularmente pa personanan cu no ta familiarisa cu e procedura digital of cu no sa con pa entrega un keho via e website di IVA.
IVA tin un departamento specifico pa trata kehonan, conoci como Meldpunt. Segun Rosa Fingal, e departamento aki ta conta cu un persona dedica pa atende yamadanan, orienta clientenan y splica nan cua ta e pasonan cu nan mester sigui pa entrega nan keho corectamente.
No obstante, e manera preferi pa entrega un keho ta via e website di IVA, caminda e cliente por yena tur informacion y contesta e preguntanan relevante relaciona cu su caso. Ademas, kehonan por wordo entrega via e-mail of personalmente na oficina di IVA.
Rosa-Fingal a enfatisa cu, independientemente di e manera cu e keho wordo entrega, IVA ta tuma contacto cu e cliente pa confirma cu a ricibi e keho. E cliente ta haya informacion tocante e clasificacion di su keho y un indicacion di e periodo den cual por spera reaccion di e persona, profesional of instancia contra kende e keho a wordo presenta.
Señora Rosa-Fingal a agrega cu e autoridad di IVA ta solamente pa actua unda tin un dunador di cuido di IVA envolvi, sea den un cas di cuido of den caso cu un dunador di cuido di IVA duna cuido na cas.
Den situacionnan di posibel abuso di un adulto mayor den seno familiar, por ehempel caminda un yiu ta maltrata su mayor, IVA no tin autoridad pa interveni directamente. Den caso asina, e situacion mester wordo reporta na Directie Ouderenzaken, cu ta un instancia concerni pa trata e tipo di casonan asina.
