Meredith Faarup-Lacle
ORANJESTAD (AAN)-- Señora Meredith Faarup-Lacle, Onderwijskundige Ondersteun na FAVI, den entrevista cu Matutino DIARIO, a sigui splica cu e sistema Braille ta e base di aprendizahe pa e muchanan ciego, pero e muchanan cu tin bao di 30% di vista (pues tur persona cu nace sano tin 100%), ta haya aumento di leternan mas grandi, pero di mes mundo ta bira moderno y tin ekiponan hopi sofistica pero tambe hopi costoso cu casi no ta pagable pa mayornan adkiri nan y pa scol mes, nan no ta prepara p’esey.
“Pa e motibo aki FAVI cuminza cu un accion pa donacion, y te cu December tin tempo pa personanan haci e donacion cu nan curazon ta desea y cu a base di e donacion ey FAVI por cumpra tur e ekiponan aki pa hiba scol, pa e muchanan cu limitacion di vista por funciona den dje, pero tambe nos por cumpra e ekiponan aki na FAVI, pa nos por sigui adapta e materialnan cu e muchanan mester”, Meredith a señala.
Meredith a agrega cu semper FAVI tin un bon relacion cu Gobierno di Aruba, y den e caso aki, Minister di Enseñanza ta na haltura di e necesidadnan cu FAVI tin, y ta informa tambe riba cada cambio cu tin. “Pasobra FAVI tin cu prepara su mes y tin cu sostene e servicio manera mester ta, pasobra no por perhudica e muchanan aki di no forma parti, mirando cu nos ta enfoca riba inclusion. Tin enseñanza obligatorio na Aruba, y si ta enseñanza obligatorio bo mester tin e full pakete aki, pa ofrece e muchanan aki cu tin limitacion di bista y pa otro limitacionnan”, Meredith Faarup-Lacle a remarca.
Den termino general, Meredith a duna un mensahe na mayornan cu tin yiu cu un of otro limitacion: “Un bez cu un profesional duna bo conseho, cu tin un retraso den e desaroyo di bo yiu, djis tuma accion, pasobra djis tin duele di dje, bo no ta bay hibe dilanti. Y corda, aworaki como mayor bo tey pa gui'e, pero aki un par di aña cu bo no tey mas, bo kier pa bo yiu ta independiente. Kiermen, cuminza di trempan cu bo yiu, dune tur guia, busca tur instancia cu ta duna sosten na bo yiu y, instancia y famia nos ta traha hunto y bo yiu lo florece. Tur cos ta posibel cu ahustacionnan accesibel pa bo yiu”, señora Faarup-Lacle a conclui
