ORANJESTAD (AAN) – E miembro di prensa Sharina Henriquez tambe a duna su impresion, den rueda di prensa, relaciona cu e encuentro cu a tuma lugar cu Formador Evelyn-Wever Croes, den contexto di reunionnan cu stakeholders, den cuadro di formacion di gobierno nobo.
Henriquez a expresa cu e tabata un hopi bon combersacion, manera Arien Rasmijn y Tito Lacle tambe a bisa. El a comenta tambe cu lo bay tin mas dialogo entre gobierno y prensa berdad lo continua, y e ta spera cu esaki lo ta cu un base mas amplio, pasobra den e ocasion aki a bay tres miembro di prensa so, y nan tampoco sa ken tur ta periodista na Aruba y ken no.
Locual e ta haya importante y a sugeri tambe, cu por facilita e proceso sin cu mester bin cu un ley, pasobra hopi biaha bo kier bin cu un ley pero despues mester wak con ta bay ehecute, kizas no ta bay pasa, pero tin maneranan facil, manera pa e siguiente crisis traha un lista adelanta, di e periodistanan acredita.
Sharina Henriquez a trece dilanti cu tambe a papia cu antes tabata tin BUVO, cu tabata un departamento completo. Na lugar cu e miembronan di prensa mester rondea core tras di e ministernan individual. No a papia di e tema pa lanta un departamento nobo, pero por ta un plataforma unda tur esnan cu ta trahando den e departamentonan traha riba dje, y prensa tambe, pa asina intercambia informacion sin cu mester organiza, por ehemplo, un conferencia di prensa di cual tin hopi y tin ora cu no tur cos cu wordo bisa ta noticia. Henriquez a acentua cu e ta spera, cu esaki no ta papiamento so, pero cu reunionnan cu prensa ta bay sigui, pero e ta depende di miembronan di prensa mes tambe, pasobra si nan ta atende e reunionnan pero no ta haci pregunta mes leu ta keda.
