Segun Sylvanio Goedgedrag di Panamerican Development Foundation:
ORANJESTAD (AAN): Hopi persona tin duda riba cuanto cantidad di awa mester bebe pa dia. Tin cu ta bisa cu mester bebe 1 liter di awa pa dia so. Otronan no ta bebe nada di awa of masha tiki mes.
Sylvanio Goedgedrag, Consultor di Salud di Pan American Development Foundation (PADF) recientemente a imparti un charla na Aruba tocante prevencion di malesanan transmiti door di awa y e manipulacion di alimentonan, a duna di conoce cu e cantidad di awa c'un persona mester bebe pa dia ta depende di su peso den kilogram.
El a splica cu pa cada 30 kilogram di peso mester bebe 1 Liter di awa. Por ehempel, un persona di 60 kilo mester bebe 2 liter di awa. Un di 80 kilo mester bebe 2,5 liter di awa y asina por sigui menciona.
El a bisa cu bebemento di awa ta un di e mihor beneficionan cu por tin pa salud di hende, principalmente den e clima cayente di Aruba pa evita e dehidratacion.
Goedgedrag tabata e orador principal durante un charla organisa door di e Fundacion Venearuba Solidaria.
https://diario.aw/categories/noticia/general/ta-recomendabel-bebe-1-liter-di-awa-pa-dia-pa-cada-30-kilogram-di-peso#sigProIdcee63f91e3
