ORANJESTAD (AAN): Ta conoci cu for di aña pasa, ora cu e pandemia di Covid-19 a presenta, e proceso di manda pashent den exterior a conoce un cambio door
di e ciere di fronteranan.
Relaciona cu e situacion actual, den entrevista cu DIARIO, Relacionista Publico di AZV, Solange Tchong a duna di conoce cu pa loke ta Hulanda, por ehempel, e situacion ta keda dificil y ta solamente casonan di suma urgencia ta bay afo.
E ta referi akinan na casonan unda e pashent tin leucemia, esnan cu tin cu bay haya terapia di 'stem cel' of transplante di riñon. Tur cos ta bay ainda bao di e exigencianan di Hulanda cu ta cu e pashent mester test negativo pa Covid-19 pa por drenta e pais, a remarca.
Tchong a sigui bisa cu pa loke ta Colombia e situacion a cambia un tiki den e sentido cu aworaki Avianca a cuminsa bula y na comienso di April nan a cuminsa cu dos buelo pa siman. Aworaki nan a informa cu ta bay aumenta e frecuencia.
"Kiermen poco poco nos ta purba cuminsa, ban bisa acomoda e pashentnan. E no ta facil, e ta keda un situacion di monitorea tur dia pa motibo cu nos no ta den e situacion normal manera cu nos tabata desea", a expresa.
E PR di AZV a agrega cu tur e pashentnan cu aña pasa a keda pendiente riba e lista di spera aworaki ainda tin cu warda pasobra awor logisticamente tin cu bay wak con ta haya e afspraaknan den exterior pa asina e pashentnan por bay afo.
Ta papia akinan di un grupo chikito di entre 30 pa 35 pashent cu ta na Colombia y tin un par tambe pa Hulanda y Merca. AZV ta keda mantene un bista riba con e situacion ta bayendo afo, Solange Tchong a splica.
AIR AMBULANCE
Relaciona cu e uzo di 'air ambulance' a laga sa cu pa loke ta Colombia, Colombia a duna Aruba lus berde pa por saca mas casonan. Pero pa loke ta Hulanda, si no tin esey pa motibo di e distancia.
Pa Colombia, e uzo di 'air ambulance' si ta asina cu Aruba por manda casonan urgente afo.
