ORANJESTAD (AAN) – Director di SVb, Edwin Jacobs, pa conclui su participacion den e conferencia di prensa di Gobierno, Dialuna, a elabora riba kico SVb ta proyecta pa resto di aña,
relaciona cu e señalnan di recuperacion den e tres areanan cu el a menciona, y esaki den cuadro di subsidio di salario y fondo di cesantia.
El a menciona cu riba dia 19 di Juni aki, tin registra na SVb 39.061 trahado. E proyeccionnan ta cu pa fin di e aña aki lo yega na 41.556 trahado registra cu ta nifica un aumento di 8.4%. “E cantidad di trahadornan registra na final di Februari, aña pasa, tabata 41.623 trahado. Y e cantidad mas abao registra durante e pandemia, tabata na Februari di e aña aki, na 38.252 trahado. Pues e cifranan ta mustra conservativo den e crecemento di trahadornan registra na SVb. A base di e indicadornan aki, nos na Banco di Seguro Social ta constata e señalnan pa un recuperacion di Aruba”, Jacobs a señala.
Finalmente, director di SVB a haci e anuncio cu Dialuna 21 di Juni awo, pa 2’ or a huramenta cuater empleado publico como “Bijzonder opsporingsambtenaar”. Cu esaki ta fortifica SVb su ekipo di Bijzonder Opsporingsambtenaar, pa un total di diez, y mirando e cifra di contagio (di covid-19) sumamente abao cu tin, ta haci cu proximamente, SVb ta bay inicia na Juli proximo, su controlnan atrobe, na pia di trabao durante dia y anochi, pasobra tur dia nan ta haya denuncia di trahadornan riba cierto desaroyonan, cu no ta cuadra sigur cu e leynan di malesa y accidente.
