ORANJESTAD (AAN) – Den conferencia di prensa di Gobierno, director di SVb, Ir. Edwin Jacobs, a menciona cu e fondo di cesantia tambe ta hunga un rol hopi importante, economicamente, den momentonan critico.
“Na momento cu un compania ta bay retira un trahador sin cu e tin culpa, e tin cu yega na un areglo di pago cune. Primeramente e mester paga cesantia; pero na momento cu e compania bay bancarota of e no por paga e cesantia mas, e trahador tin derecho di acudi na SVb pa haci un apelacion riba e fondo di cesantia”, Jacobs a indica.
El a agrega cu na momento cu e pandemia aki a cuminza y cu Aruba a bay den lockdown, e escenarionan pa cu fondo di cesantia tabata hopi pesimista. A expect un demanda grandi pa e beneficio di cesantia, pero SVb a nota cu den aña 2020, 82 peticion pa cesantia keda entrega y procesa, cu tabata pertenece na tres compania. Y e suma cu a paga tabata 134 mil florin na cesantia, sigur un cifra cu a sorprende SVb.
“Pero di otro banda, mester bisa cu e programanan cu gobierno a presenta pa sostene e companianan, pa pasa door di e momentonan aki, a duna un contribucion cu e companianan no mester a yega den problema di retira trahador y keda sin paga nan e cesantia. Pa 2021, te cu 21 di Juni awo, 56 peticion pa cesantia a keda entrega y procesa, cual trahadornan ta pertenece na seis compania y SVb a paga 301 mil florin caba.
Locual nos tin pendiente pa procesa ta 56 peticion calcula na 354 mil florin. E cifranan tampoco ta mustra un desaroyo preocupante, cu e fondo di cesantia. E peticion di e companianan a keda, relativamente, hopi abao di locual nos a premira pa e aña aki, na luna di December.
Otro indicador cu nos a uza pa por determina si nos ta papiando di recuperacion, ta e cantidad di trahadornan inscribi pa e seguro di malesa y accidente”, Jacobs a indica.
El a splica cu segun e Leynan di Seguro di Malesa y Accidente, tur trahador di sector priva, mester ta sigura pa ambos seguro.
“Segun e ley, e dunador di trabao tin obligacion pa, entrante prome dia di trabao, e trahadornan ta sigura. Desde e pandemia, na Maart aña pasa, nos a tuma nota di un tendencia continuo na reduccion di cantidad di trahadornan sigura y cantidad di relacionnan di trabao sigura na SVb. Pero desde maart di e aña aki, nos ta nota cu e tendencia a bolter, y e cantidad di trahadornan a cuminza crece atrobe. Y pa e luna di Juni, nos ta mira cu e cantidad di trahadornan a surpasa esunnan di April y Mei. Mesun cos ta conta pa e relacionnan di trabao registra. Un trahador por traha na mas cu un caminda, y e ora ey pa cada relacion di trabao e ta wordo sigura, y desde Maart, aunke na Februari ya caba a stabiliza, nos ta mira un crecemento den esaki durante cuater luna sigui. Un crecemento, pa nos ta un indicador cu e ta bay sigui pa e proximo lunanan”, director di SVb a señala.
