E Corant Digital di Mexico “El Combate”:
ORANJESTAD (AAN) – E medio digital mexicano “El Combate” cu tin su raiz den e Corant Spaño “El Debate” funda na aña 1910, ta wordo considera como un digital serio cu ta goza di credibilidad, cual awo ta pronostica cu papel toilet ta den serio peligro di extincion.
Na April ultimo “El Debate” a saca un publicacion tocante e corto tempo di bida cu papel toilet falta pa biba. Awendia, tur idea of proyecto ta cana den direccion di contraresta contaminacion, y papel toilet ta uno cu segun gruponan medio ambiental, ta un di e productonan cu mas contaminacion ta genera, y awo e ta “na mira” pa, supuestamente cay den “desgracia”.
Papel toilet ta un elemento habitual den casnan di famia, lugarnan di trabao, institucionnan di servicio, etc., etc., for di tempo cu el a wordo inventa, na mitad di siglo XIX, na Merca.
No obstante cu semper tabata tin e creencia cu papel toilet ta un producto ecologico y facil pa desecha, e verdad ta cu e ta contene cellulose y esnan cu a bira mas moderno, pasobra ta extra suave, tin mester di un porcentahe mas halto di fibra vegetal nobo. E ecologistanan a agrega e punto aki den nan vision pa motibo di e impacto medio-ambiental cu esaki ta causa.
E Cientificonan di Universidad di Florida, a dicidi investiga e riesgo real cu e producto aki, asina importante pa e higiene personal, tin pa nos medio ambiente, y nan a conclui cu por e por ta un fuente di substancianan kimico potencialmente peligroso pa e salud humano.
