ORANJESTAD (AAN)— Ohala mayoria di e ciudadanonan na Aruba, cu no a vacuna ainda, haci uso di e oportunidad di e vacunathon-2, Diasabra 22 y Diadomingo 23 di Mei aki.
E hefe di Departamento di Malesanan Contagioso (DBZ) di Departamento di Salud Publico, Sharline Koolman a splica con e proceso lo sigui despues di 1 di Juni, unda cu e personanan cu lo dicidi di vacuna despues di e vacunathon aki, mester bay DBZ (Dienst Besmettelijke Ziekten), anto riba afspraak, locual si e persona ta bay biaha y pa motibo di esaki tin di cumpli cu e exigencia mundial di e momento, cu ta mustra cu ta vacuna, kizas no ta haya e fecha asina lihe manera e kier.
Corda cu ta diferente tipo di vacuna DBZ ta suministra y esey ta haci, tin biaha, cu no tin lugar pa tur hende sinta warda. Den pasado, prome cu e pandemia sigur, esaki tabata e comentario di diferente ciudadano cu ta haya anualmente e vacuna contra Influenza y cu mester a warda hopi, pasobra un hende tabata tin pa vacuna, mientras cu nan wardando tabata basta, mas den tempo cu e muchanan cu ta bin pa traha den bar na San Nicolas, yega. Nan ta bin den grupo, pa haya un tipo di vacuna tambe. Y mirando cu dentro di poco mas medida lo wordo hala atras, asina cu e cantidad di hendenan vacuna contra covi-19 aumenta, muy posiblemente e parti di e economia di bida nocturno na San Nicolas, tambe lo amplia, y e por nifica mas tempo di spera pa esnan cu lo kier vacuna contra covid, e ora ey.
Ademas cu tin hopi pais den nos region cu ta exigi e vacuna contra malaria (of keintura geel), y ya pa Juni, Juli esey lo ta e caso, ya cu e temporada di vacacion grandi ta bin, y aki ta trata hopi biaha, di famianan cu ta bin hunto pa ricibi e vacuna aki.
Pues, Diario tambe kier encurasha tur hende cu por, pa bay vacuna durante e vacunathon-2 aki, tanto esnan cu falta e di dos dosis como esnan cu tin cu haya e prome dosis. Te e momentonan aki, no tin informacion den comunidad, ni di gobierno, ni hospital cu por tin un of mas ciudadano cu lo a pasa den situacion critico debi na e vacuna. Ta mas tanto cu e braza por bira pisa, por haya cansancio, soño, of un tiki keintura kizas.
Diario mes a papia cu varios persona cu a pasa den su prome y di dos dosis, y realmente nan a sinti un minimo di malestar y cu tin basta cu no a sinti net, net nada; pero ta sigui cuida y cumpli cu e medidanan sanitario y tapaboca, tanten e normal nobo no cambia cu mas amplitud.
