Ta invita comunidad pa pasa laga un paso riba e caminda di donacion na Funari

Jaydienne Loefstop di Funari:

• Cu campaña ‘Un Paso pa bida’ Funari kier alcansa 25 mil 

ORANJESTAD (AAN): Campaña di Funari ‘Un paso pa bida’ a inicia dia 1 di September y lo continua te cu 30 di november cu e meta di recauda 25.000 Florin pa sostene y fortalece e servicionan cu e fundacion ta ofrece na su clientenan cu limitacion fisico.

   Durante e periodo aki, Funari ta invita comunidad, companianan y su propio clientenan pa haci un contribucion y, simbolicamente, pone nan paso riba e caminda di Funari.

   Relacionista Publico di Funari, Jaydienne Loefstop a splica con e campaña ta hinca den otro. Como parti di e campaña, Funari a crea un caminda special na su centro. E caminda a wordo prepara hunto cu su clientenan, cu a participa activamente den e proceso di construccion y decoracion.

   Cada persona of compania cu haci un donacion lo haya un ‘paso’ riba e caminda. E paso ta simbolisa e contribucion cu e donante a haci pa yuda Funari sigui dilanti cu su mision. Riba cada paso lo pega un sticker cu nomber di e persona of compania cu a contribui. Donantenan cu prefera keda anonimo por opta pa e mensahe ‘Amigo di Funari’ of ‘Mi ta kana cu Funari’.

  Segun Loefstop, campaña ta consisti di cuater ‘paso’ di contribucion:

(*) Paso Chikito – Donacion di 10 Florin of mas. Esaki ta color biña y ta representa forsa, enfatisando cu hasta e contribucion di mas chikito tin gran balor.

(*) Paso Normal – Donacion di 50 Florin of mas. E paso aki ta color blauw y ta representa fe, motivacion y determinacion cu ta cualidadnan cu ta yuda Funari y su clientenan sigui dilanti.

(*) Paso Special – Donacion di 100 Florin of mas. Esaki ta e paso berde cu ta representa Funari mes, ya cu berde ta e color principal di e fundacion y di su logo.

(*) Paso Impacto – Donacion di 200 Florin of mas. E paso ros ta representa abundancia y generosidad. E ta pa personanan y companianan cu ta desea di haci un contribucion mas grandi.

   Cu e campaña ‘Un paso pa bida’, e fundacion ta enfatisa cu no ta solamente nan ta invita comunidad y companianan pa contribui. Tambe clientenan y nan famianan ta wordo invita pa participa, segun nan posibilidad, ya cu cada contribucion ta yuda Funari sigui ofrece su servicionan.

    Personanan cu ta desea di haci un donacion, participa den e campaña of haya mas informacion por tuma contacto directamente cu FUNARI via su plataformanan di social media of telefon.

   Cu cada donacion, comunidad ta pone un paso mas riba e caminda pa rehabilitacion, inclusion y un futuro cu mas oportunidad pa clientenan di Funari. Hunto nos por yega na e meta di 25.000 Florin.