“Ta importante pa reformanan tuma lugar pa e economia di e islanan bira mas fuerte y resistente”

Secretario di Estado:

ORANJESTAD (AAN): Dialuna atardi a tuma lugar un conferencia di prensa, relaciona cu e asina yama Bestuurlijke Vierlandenoverleg entre Aruba, Corsow, St. Maarten y Hulanda, cu a tuma lugar e biaha aki na Aruba.

Prome Minister di Aruba Evelyn Wever Croes pues a reuni cu Prome Minister di St. Maarten Silveria Jacobs, Prome Minister di Corsow Gilmar Pisas y Secretario di Estado Hulandes Alexandra van Huffelen riba varios punto.

Pa cuminza e conferencia di prensa Wever Croes a cuminza na bisa cu e reunion tabata bastante fructifero.

El a indica cu a papia entre otro riba 3 scenario, unda cu na final e meta principal ta pa e paisnan bira mas fuerte, unda cu e intencion ta tambe pa yega na un mihor bida pa tur esnan cu ta forma parti di Reino Hulandes.

Live prensa di e diferente islanan por a haci pregunta na e diferente Prome Ministernan y na e Secretario di Estado.

Hulandes.

Un di e preguntanan for di prensa di Corsow tabata kico a logra cu e reunion y Prome Minister di Corsow Pisas a indica cu no ta 1,2 , 3 ta yega na solucionnan, pero cu e intencion ta pa sigui negocia na Augustus.

Prensa a puntra tambe con a para cu e placa cu Hulanda a priminti na Corsow, pa yuda entre otro cu renovacion y construccion di scolnan.

Pisas a indica cu e placa cu a wordo acorda via e acuerdo politico di COHO no a yega Corsow ainda.

E Prome Mandatario a indica cu mirando e estado di e scolnan na Corsow di berdad e 30 miyon florin cu a wordo acorda pa duna na Corsow ta hopi necesario pa yuda cu e scolnan y diferente otro proyecto importante.

“Mi ta spera cu e tardanza di yegada di e placa no stroba e desaroyo di Corsow”, segun Pisas.

Van Huffelen a haya e pregunta tambe riba obhecionnan contra COHO.

E Secretario di Estado a indica cu el a papia cu e Prome Ministernan riba e Rijkswet y segun van Huffelen no a papia solamente riba e reformanan, sino tambe riba e hecho cu di otro banda Hulanda mester brinda sosten di likidez.

“Ta importante pa reformanan tuma lugar pa e economia di e islanan bira mas fuerte y resistente”.

Nos lo sigui papia riba con mihor pa logra esaki y nos lo tene cuenta cu e puntonan di e diferente Parlamentonan, segun e Secretario di Estado.