Ta importante pa detecta trempan si un mucha tin mester di atencion special

ORANJESTAD (AAN): Dr. Kelly Hantak y Dr. Michael Abel di Universidad di Missouri a wordo invita pa asisti den e proyecto di intervencion trempan pa no nos muchanan cu necesidad special den centro di cuido pa mucha, cu ta un proyecto cu Anouk Eman a propone.

E proyecto piloto a cuminza e siman aki y despues di un session di brainstorming DIARIO a entrevista Hantak y Abel.

Dr. Hantak a cuminza na bisa cu e session a bay bon y cu awor e stakeholders a haya huiswerk pa nan pensa riba dje y pa yuda nan desaroya e sistema cu nan ta buscando.

“Mi ta sinti cu nan kier logra locual ta beneficia tur hende den esaki, specialmente e muchanan”, segun Hantak.

Dr. Abel di otro banda a trece dilanti cu nan a cuminza door di papia riba algun di e casonan di muchanan cu necesidadnan special na Aruba.

“Nos a logra compronde e poder di e storianan aki y con esaki ta afecta esnan cu ta traha cu e muchanan”.

Afortunadamente Aruba tin un grupo tremendo di stakeholders y e combersacionnan di awa tabata entre otro riba con lo por crea un plan nacional pa intervencion trempan na Aruba, segun Abel.

El a indica cu a papia tambe riba kico ta algun di e bareranan cu tin, si kier logra e meta di screen tur mucha trempan pa wak si tin algun problema di desaroyo.

Ta importante pa detecta e necesidadnan aki trempan, pa despues nan por ricibi e servicio corecto pa yuda nan.

DIARIO a punta Dr. Abel tocante e manera pa atende cu muchanan cu Autismo pa mas mihor yuda nan, mirando cu e un di e preguntanan ta si haciendo mas por yuda e mucha cu Autismo funciona mihor den comunidad.

Segun Abel, tin varios manera pa determina cuanto Autismo ta afecta un mucha y nan habilidad pa interactua cu otro hende, nan habilidad pa siña y nan habilidad di presta y biba na un manera exitoso den comunidad.

Pesey DIARIO a puntra Abel si tin metodonan specifico pa yuda un mucha Autista mehora su mes y el a splica cu esey sigur ta e caso y cu pesey specialistanan ta necesario pa haci esaki.

“Esaki ta un parti importante pa loke ta enseñanza y pa loke ta salud”, segun Abel.