Segun señor Rino Hermans di CMO:
ORANJESTAD (AAN): Actualmente, cientificonan no por predici un temblor indicando exactamente ki dia of ora e lo pasa, na unda e lo tuma luga ni ki magnitud e lo tin. Señor Rino Hermans di Crisis Management Office Aruba (CMO) ta di opinion cu naturalesa mes no ta permiti ningun cientifico determina esaki tampoco.
Segun Hermans, hopi di e criticannan y comentarionan cu ta circula riba medionan social ta mustra cu ainda tin falta di conocemento tocante e topico. El a enfatisa cu, prome cu critica of saca conclusion y manda e informacion rond, ta importante pa ciudadano informa y educa nan mes miho tocante con e fenomenonan natural aki ta funciona.
Pa loke ta trata e torennan cu CMO a instala recientemente, Hermans a splica cu esaki ta principalmente un sistema di alerta pa tsunami. El a remarca cu un maremoto, es decir actividad sismico cu ta tuma luga bou di lama, por genera un tsunami. Un teremoto cu ta tuma luga riba tera, no ta genera un tsunami directamente. E riesgo ta principalmente relaciona cu actividad sismico bou di lama.
Hermans a expresa preocupacion tambe tocante e cantidad di informacion incorecto cu ta circula actualmente riba medionan social relaciona cu fenomenonan natural cu a sosode recientemente den diferente pais. Segun e, hopi persona ta presenta nan mes como fuente di informacion, influencers, sin tin suficiente conocemento di e materia, mientras cu ciudadanonan ta sigui e informacion aki y, den cierto caso, ta drenta den panico innecesariamente.
El a enfatisa cu, despues di 27 aña di experiencia, CMO a demostra su capacidad y a logra reconocemento tanto internacionalmente, den Reino Hulandes como den Caribe, como un organizacion stabiel cu ta dedica su mes na preparacion, informacion y educacion di comunidad.
Segun Hermans a enfatisa, loke ta resta ta pa comunidad mantene confianza den e instancianan oficial y busca informacion cerca fuentenan confiabel, specialmente den momentonan cu por causa preocupacion of incertidumbre.
