Jimmy Douglas di Aruba Ariba Tours:
ORANJESTAD (AAN): Mester bin un balance entre naturalesa y comercio, asina señor Jimmy Douglas di Aruba Ariba Tours a expresa den un entrevista cu DIARIO.
Douglas a duna di conoce cu e grupo den pasado a acerca, entre otro, Minister di Turismo Wendrick Cicilia, Minister di Husticia Arthur Dowers y varios consehero.
Diamars nan a reuni cu Fraccion di AVP buscando un solucion pronto pa logra un balance entre proteccion di naturalesa y e actividad comercial den e sector di tours.
Señor Douglas ta referi na e hecho cu ya pa aproximadamente tres luna varios caminda na costa, conoci pa wordo uza pa tours off-road cu turista, ta blokea cu baranca.
El a menciona cu hopi hende na Aruba ta depende riba e sector di tours pa cria nan famia y, segun e, ta importante pa busca un solucion cu ta proteha tanto naturalesa como e personanan cu ta genera nan entrada den e sector aki.
Segun Douglas, e situacion a yega na un nivel extremo. El a indica cu, segun su punto di bista, un organizacion na Aruba cu ta dedica su mes na proteccion di shoco no ta suficientemente habri pa considera un balance entre comercio y conservacion di naturalesa.
El a remarca cu ta tempo pa tur parti sinta na mesa y busca un solucion hunto, pasobra cada dia cu pasa cu e camindanan keda cera, e impacto economico riba hopi trahado den e sector ta bira mas grandi.
Douglas a reitera cu no ta solamente Aruba Ariba Tours ta buscando un solucion, sino hopi otro compania di tour na Aruba tambe. E intencion, segun e, ta pa alinea e diferente interesnan y yega na un solucion cu por funciona pa tur parti.
“Nos no ta kere den confrontacion, pero ora cu a purba den diferente manera pa yega na un solucion sin logra, e ora lo busca otro manera, entre otro un caso legal of organiza y mobilisa e sector riba rutanan di Aruba,” señor Douglas a expresa.
Despues di e reunion cu Fraccion di AVP, Douglas a indica cu nan ta duna e fraccion beneficio di duda, pero cu nan ta spera di mira mas accion y menos papiamento.
“Awor nos mester accion. Y si no bin accion, nos mester crea nos mesun accion,” el a enfatisa.
For di e reunion cu e fraccion, a conclui cu lo haci follow-up cu Departamento di Transporte Publico (DTP) pa determina unda e trancamento ta y con por sigui traha pa un solucion.
