Ta haci un yamada na e desaroyador pa cumpli cu rehabilitacion di parti di Baby Beach

Parlamentario Otmar Oduber di PPA:

ORANJESTAD (AAN)—Parlamentario y Lider di Partido PPA, Otmar Oduber, den entrevista cu DIARIO a referi na e negociacion cu e grupo concerni, cu ta bin e hotel riba e clip na San Nicolas, y a palabra di un inversion cu e desaroyadornan ta bay haci.

Oduber a aplica cu Aruba a perde dos tercer parti di e Beach di Baby Beach, net pariba di Rum Reef, door di e horcan mas of menos 22 aña pasa, y den e negociacion nan a yega na un acuerdo cu e desaroyadornan cu nan lo inverti mas of menos 2 miyon dollar, pa recrea e beach completo.

Esaki pa haci e beach mas of menos di 40 pa 50% mas grandi, mas amplio, mas espacio di loke tin aworaki pero cu ta conforme na loke tabata tin 20-25 aña pasa. Otmar a haci un yamada na e desaroyadornan, pasobra ainda nan ta na tempo, debi cu, lamentablemente, e no ta scucha nada mas riba e parti aki. “Mi sa, pasobra ami mes ta e minister cu a pasa e ley di Marine Park, y cu ta duna cierto proteccion na nos lamanan, pero den e tempo ey nos a bisa caba cu no ta un beach nan ta bay crea, sino un beach cu nan ta bay recrea, pues cu tabata existi caba y nan ta bay pone den su forma original, y cu esey tabata mehora of percura pa tin un ampliacion na Baby Beach, na momento cu nan tin e hotel ta bin eyriba”, Oduber a relata.

Otmar Oduber ta señala cu hopi hende ta papia cosnan pero nan no sa e esencia di e informacion, y e pregunta aworaki ta na e instancianan, na e desaroyadornan, na gobierno, si den e preparacion cu ta bay habri na Juni, si a percura pa e beach aki ta bay wordo rehabilita, manera cu e tabata anteriormente.