Parlamentario Arthur Vallejo: --- *Hulanda ta poniendo hopi presion riba sosten di likidez
ORANJESTAD (AAN): Diaranzon mainta fraccion di MEP a tene un conferencia di prensa, unda cu parlamentario Arthur Vallejo como presidente di e comision di salud a duna un recapitulacion di locual a wordo trata den Parlamento Diamars.
“Nos a trata temanan fundamental pa cu nos cuido medico”.
Ta temanan hopi importante pasobra Hulanda ta poniendo hopi presion pa loke ta e sosten di likidez y pa nos corta 60 miyon florin den salubridad, cu sigur ta bay crea reformanan den nos AZV of den nos fondo di cuido medico, segun Vallejo.
E parlamentario a amplia cu fraccion di MEP su intencion ta pa salvaguardia y mantene un garantia pa cu e personanan mas vulnerable y crea un ‘vangnet’ pa esnan vulnerable y cu problema di movilidad.
“Nos kier sigura tambe cu ta bay tin un campaña di informacion, caminda cu e asegurado por sa tur su derechonan na momento cu haci e reforma y tambe nos kier a asegura cu na AZV lo tin personanan competente cu kier yuda soluciona problema, of duna informacion pa cu esaki”, segun Vallejo.
El a sigui bisa cu ta notable cu fraccion di AVP a vota contra e mocion, pero afortunadamente e mocion wordo aproba.
