ORANJESTAD (AAN): Dialuna 8 di November a tuma luga e reunionnan di Tripartiet entre Aruba, Corsou y St Maarten.
Premier di Aruba, Señora Evelyn Wever-Croes a gradici Premier di Corsou, Señor Gilmar "Pik" Pisas y Premier di St Maarten, Señora Silveria Jacobs pa a contribui na e exito di e reunion aki y e informacionnan cu cada un a brinda. Na final di e reunionnan, a tuma luga un conferencia di prensa na unda cu cada Premier a duna nan declaracion con e reunionnan a bay.
Premier di St Maarten, Señora Silveria Jacobs, mescos cu Premier di Corsou, a expresa cu ta un placer pa ta na Aruba cu e delegacion pa trata temanan di interes comun den un forma mas detaya compara cu na otro ocasionnan na unda e premiernan tabata dialoga via e metodo digital.
Premier Silveria Jacobs ta expresa e importancia di e encuentro
“Danki na e encuentro aki tin mas claridad riba similaridadnan entre e paisnan pero tambe di e diferencianan cu tin y tambe con por yuda otro den e areanan aki. Mi ta kere cu nos a bin hunto buscando sinergia entre e tres islanan pa mehora eficiencia y haci miho uso di experiencia di cada pais. A base di esaki lo pone mas recurso disponibel pa aumenta efectividad y bay dilanti mas eficientemente”.
Premier Jacobs ta enfatisa cu door di Covid, varios relacion nobo a wordo estableci pa Sint Maarten
“Covid-19 tabata un disaster nobo pa mundo henter incluyendo nos di islanan chikito. Sint Maarten particularmente cu ta situa riba e ruta di horcan / ‘hurricane belt’, tin experiencia caba cu diferente disaster. Pero na momento cu covid a presenta ainda e isla tabata den proceso di recuperacion for di un disaster natural. Mester bisa cu durante di e periodo di Covid varios relacion nobo a wordo estableci cual ta un paso grandi. Awor e meta ta pa hunto sigui bay dilanti pa bin cu strategia nobo pa trece cambio pa tur esnan cu a elegi nos como sirbido di comunidad”.
Recitando un proverbio Africano, Premier Jacobs ta enfatisa cu ta hunto nos ta mas fuerte
“A traves di e encuentronan aki ta construyendo lasonan mas fuerte cu ya caba tabata existente ora cu e islanan tabata den Antiyas y no por lubida cu te dia di awe tin lasonan familiar. Pues mientras cu ta brasa e diferencianan, nos a realisa cu tin mucho mas den comun y hunto nos ta mas fuerte. Tin un proverbio Africano ta bisa: If you want to go fast you go alone, but if you want to go far you go together.”
"Mi ta kere cu awe nos a cement e relacion aki cu e comprendemendo cu aunke cu nos por yega leu nos so, nos por yega mucho mas leu hunto y hunto nos ta mas fuerte. Pues mi ta ansioso pa sigui cu e encuentronan aki por lo menos cada kwartaal pa di e forma aki por para hunto como islanan chikito den desaroyo / Small Island Developing States (SIDS), den e mundo aki cu ta cambia continuamente. Ta haci esaki na beneficio di tur habitantenan di e islanan Aruba, Boneiro y Sint Maarten”.
Prome Minister di Aruba, Señora Evelyn Wever-Croes ta gradici Premier di St Maarten, Señora Silveria Jacobs pa comparti informacionnan hopi valioso y importante den e reunionnan di Tripartiet. Lasonan mas fuerte ainda a wordo concretisa pa asina hunto Paisnan den Reino pasa door di e diferente retonan cu cada un ta encontra.
