Anselmo Pontilius:
ORANJESTAD (AAN): Tur cos ta mustra cu Departamento di Recursonan Humano (DRH) ta encaminando e proceso pa asina yega na e nombramento di un Mediador nobo. Anselmo Pontilius, actual Mediador di Gobierno a duna di conoce cu e cambio di gobierno no mester stroba e proceso aki.
El a sigui bisa cu na januari a combersa cu directora di DRH y e speransa ta cu den e dianan aki por haya sa di un of otro candidato y cu esaki por wordo formalmente introduci y cuminsa asumi e rol di Mediador.
E persona aki lo tin e funcion pa atende cu no solamente referendum, pero tambe cu mediacion entre sindicatonan y dunador di trabao, pero di trata di pone mas tareanan manera coordina formacion di e dirigentenan sindical y dunador di trabao, el a bisa.
Tambe e mester por anticipa e situacion den e mercado laboral y señal'e na gobierno. Pa loke ta referendum, den e ultimo lunanan masha poco tabatin, Pontilius a duna di conoce.
Importante pa cualkier institucion ta cu si por evita conflicto laboral, trata di haci esey. Esey ta e satisfaccion pa oficina di Mediador, el a remarca.
