Silencio den beneficio comercial mundial di caida prijs di petroleo
*Balor di Euro vs. Florin Arubano ta sigui subi den crisis mundial
*Con caida di prijs di petroleo na April ta baha prijsnan na Aruba?
ORANJESTAD (AAN) — “E secreto cu aparentemente mundo tin problema pa cuestiona, ta e beneficio comerical directo cu cantidad di instancianan y personanan tabata tin den e caida mundial di prijs di petroleo.”
Esaki ta parti di e informacionnan pisa cu DIARIO ta ricibi di informantenan experto internacional cu cual DIARIO ta mantene contacto continuo den e situacion mundial cu a surgi na 2025, pero cu DIARIO a anuncia for di 2023.
E situacion mundial ta trece cambio riba tur tereno pero tin su splicacion directo den e circulacion directo di placa na nivel internacional den un cambio di mercado di interesnan comercial basico, cu ta surgi na e momentonan aki.
Cu puntonan di bista cu tabata existi riba tur tereno mundial economico y financiero por conoce cambio den e situacion nobo, sigur a bini dilanti den e hecho cu Parlamento, Tweede Kamer, Hulandes ta bolbe presta atencion na e posibilidad pa yega na tratadonan comercial cu paisnan di Sur America, na momento di un crisis den e relacionnan cu Merca.
Paisnan Sudamericano uni den Mercosur, pues Brazil, Uruguay, Paraguay, Argentina y Bolivia, a acerca Union Europeo pa trata na alcansa un relacion comercial, cu na prome instancia no tabata tin mucho interes di parti di Hulanda.
Sinembargo, den e situacion mundial nobo, paisnan Europeo cu na prome lugar tabata basa nan mes riba relacionnan comercial cu Merca, ta cuminsa pone atencion pa posibilidadnan nobo riba tereno comercial.
Informantenan di DIARIO ta splica cu si Hulanda como parti di Union Europeo por alcansa un relacion cu paisnan den Sur America, esaki lo por ta sumamente beneficioso pa Aruba, ya cu como miembro di Reino Hulandes, Aruba por beneficia na forma indirecto di e relacionnan aki.
Ta keda, sinembargo, a base di e experencianan cu historia a laga atras di stabilidad politico na Sur America, cu entre otro na Venezuela ainda ta un hecho cu a afecta Europa, cu Reino ta tuma su tempo pa yega na un decision.
Mientrastanto e pregunta grandi ta keda mundialmente, con probecho comercial a wordo saca mundialmente for di e caida directo di Dollar, cu a contribui na accionnan comercial internacional.
Pues mester por spera un caida pisa di prijs den e caida di prijs di entre otro transportacion manera gasolin na Aruba.
Caida di balor di Dollar tabata na momento di caida total di e prijs di petroleo, cu impacto enorme riba e prijsnan cu a wordo paga den e tempo pa petroleo, cu te awe a keda hopi bou nivel di e prijs cu tabata wordo spera y asina riba prijs mundial di tur articulo.
Pa Aruba esaki tambe ta sumamente importante pa ciudadanonan di Aruba mes, cu mester paga pa productonan cu a base di caida di e prijs di petroleo na forma drastico, mester haya splicacion con prijsnan di transportacion a baha y con esaki ta refleha den prijsnan cu mester paga na Aruba.
Informantenan a mustra cu den e turbulencia mundial actual, den cual miedo pa un guera mundial ta mas grandi cu nunca, bista ta wordo kita for di cierto realidadnan y uno di nan ta cu mundialmente e caida di prijs di petroleo mester resulta dentro di mas o menos dos luna, den calculacion di costo cu ta dicidi pa prijs na Aruba.
Manera ta bini dilanti, prensa awor tin un deber mas grandi cu nunca pa informa Arubianonan di impacto mundial cu sigur mester spera na un pais cu ta biba di turismo.
Con e Florin debil pasobra e ta mara na Dollar ta enfrente e Euro di Hulanda cu a sigui subi y awor a bira 206.65 Florin Arubano pa Un Euro.
Pues pa Aruba tur loke ta bini di Europa ta mas costoso mientras mester tene e relacion entre Aruba y Hulanda na bista sigur pa gasto cu mayornan tin si nan tin yiu ta studia na Hulanda por ehempel. Di otro banda e Arubiano cu ta ricibi asistencia di un forma of otro di Hulanda, ta beneficia di e forsa di Euro.
E situacion mundial nobo sigur ta afecta Aruba cu mester duna apertura na mas informacion importante den areglonan cu ta crea cu Reino den un situacion mundial caotico cu manera ya bisa por presenta posibilidad nobo pa Aruba pero tambe tin otro efecto.
DIARIO continuamente ta den contacto cu su informantenan riba tereno internacional sigur na Merca y Hulanda pa por informa Aruba di tur detaye cu e situacion mundial ta produci pa Aruba.
