Solange Tchong di AZV
ORANJESTAD (AAN): Ultimo añanan, hopi ciudadano ta tumando inyeccionnan sea ta pa baha peso of estetico for di personanan cu no ta autorisa of competente pa haci esaki. PR di AZV, señora Solange Tchong, durante un entrevista recien cu DIARIO a duna di conoce cu AZV ta na haltura di e comportacion aki ya pa algun tempo caba.
El a remarca cu e pensamento tras di bin cu un seguro medico general na 2001 tabata pa crea un seguro pa tratamento medico cu tey pa tur ciudadano. Sinembargo, AZV mes no tin un rol directo pa controla kico tur tin eyfo cu ta ilegal of no bon. Tampoco AZV ta registra diagnostico di pashentnan, entre otro si nan ta huma, of loke nan ta haci cu ta causa complicacionnan medico pa nan mes.
Segun e, esaki ta asina tambe pa personanan cu ta haya complicacionnan como resultado di inyeccion cu a wordo tuma door di producto ilegal or productonan cu no ta bon, entre otro door di inyeccion estetico (botox) y inyeccion pa baha peso mas lihe (Ozempic).
“AZV ta na haltura di e problematica aki, pero no por interpret’e den cifranan of gastonan directo pasobra nos no tin e dato aki pa motibo cu AZV no por bay coba den dossier di pashentnan. Esaki ta hacie dificil pa AZV”, señora Tchong a duna di conoce.
El a menciona cu docternan si por constata complicacionnan causa door di inyeccionnan ilegal aki, pero entre docter y pashent tambe tin regla di secrecia. El a bisa cu no por conclui si docternan lo kibra e confianza aki.
Señora Tchong a enfatisa si, cu tur ciudadano di nos pais, tin e responsabilidad di controla si loke nan ta wordo ofreci como inyeccion ta bon y legal. Cada un di nos tin e responsabilidad civico pa meld situacionnan y lugarnan of personanan cu ta duna inyeccion sin ta autorisa of competente. Pa esaki, nan mester tuma contacto cu Inspeccion di Salud Publico cu lo haci investigacion riba e lugarnan y personanan aki.
