Magaly Brito, Secretario General SEPPA:
ORANJESTAD (AAN) – E directiva di Sindicato di Empleadonan Publico y Priva Aruba “SEPPA” su tarea principal ta controla e trabaonan, manera e ta un “Raad van Toezicht” y ta delinea hunto cu e Comite Ehecutivo e direccion cu e organizacion tin cu bay. “Y e tambe tin un control si e Comite Ehecutivo realmente ta ehecuta e tareanan segun e plan di trabao cu nos Congreso a aproba den nos ultimo añanan”, Magaly Brito a comenta, den entrevista cu Matutino DIARIO.
“Mi tin cu bisa cu e ultimo añanan e directiva tabata hopi mas disponible pa, entre otro, bay den ehecucion di trabaonan tambe, of acudi na e diferente reunionnan hunto cu e Comite Ehecutivo, p’asina un apoya otro den e cantidad di trabaonan cu tin. Mi tin cu bisa tambe cu, pa SEPPA, e ultimo añanan a crece hopi den sentido di nos miembresia, y tambe na lugarnan di trabao. Anto, nos tin negociacionnan di Contrato Colectivo andando, y akinan nos tin diferente miembro di e directiva cu ta apoya nos den e proceso aki”, Brito a relata.
E ta spera cu e directiva cu ta wordo elegi awe, lo haci mesun cos y mas ainda, si nan por ta hopi mas disponibel pa trabaonan. “Nos, naturalmente como Comite, ta gradici esaki”, Magaly Brito a acentua.
