Cu 100 dia di compromiso:
ORANJESTAD (AAN): Awor cu coalicion AVP-Futuro a marca su prome 100 dia di gobernacion, Fraccion AVP den Parlamento di Aruba ta reflexiona cu orguyo y determinacion riba e papel importante cu e fraccion ta sigui desempeña den e proceso di maneho di nos isla.
Como representante di pueblo, Fraccion AVP tin un responsabilidad fundamental: vigila, controla y orienta e rumbo cu e coalicion a defini pa Aruba. Den e 100 dia aki, nos parlamentarionan no a keda atras: nos a tuma e iniciativa pa pidi transparencia, claridad y dunament’i cuenta riba tur plan y gasto publico.
A convoca varios audiencia y reunion cu diferente minister, pa exigi respuesta na cientos di pregunta cu ta importante pa pueblo.
Asuntonan manera aviacion, salud, infrastructura, finansas y educacion a pasa den e control parlamentario, pa garantisa cu e plan di gobernacion ta alinea cu necesidad real di Aruba.
Nos fraccion tambe a tene dialogo constante cu stakeholdernan di comunidad – for di organisacionnan no-gubernamental y empresarial – pa scucha, evalua y formula politicanan cu tin un base real. E contacto structural aki ta duna base y direccion na e rol cu nos mester hunga den formulacion di ley y aprobacion di presupuesto.
Den contexto di e presupuesto nacional, Fraccion AVP ta pone enfasis riba un uzo balansa y responsabel di fondo publico.
E prome 100 dia a demostra cu Fraccion AVP ta activo, alerta y presente. Nos ta keda comprometi na sigui eleva e nivel di gobernacion, no solamente cu palabra, pero cu accion concreto y trabou duro den beneficio di tur Arubiano.
Nos ta gradici pueblo pa e confiansa y ta conta cu su apoyo pa sigui lanta Aruba hunto.
