ORANJESTAD (AAN) – Manera nos comunidad por corda, aña pasa no tabata tin practicamente, actividadnan escolar ni popular, relaciona cu e fiesta di Dera Gai, pa motibo di e pandemia.
Por ta aki, aya lo a cende algun candela pa kima sushi, pero no tabata un dia cu yen di huma manera ta sosode den e barionan unda mas di un famia ta dicidi pa kima sushi, den añanan anterior.
Aworaki, manera por a scucha di Minister Presidente mes, e situacion di Aruba pa cu Covid-19 ta den un area di hopi comfort.
Posiblemente lo tin algun scol unda cu alumnonan di diferente klas lo presenta baile di Dera Gai, y lo celebra cu precaucion y cautela, e fiesta asina bunita aki. Departamento di Cultura tambe lo tin su actividad, y por spera cu den un of otro centro di bario lo por tin un evento.
Ban spera tambe cu lo tin cierto protocolnan, pasobra mas cu ta tiki caso di covid-19 pa dia Aruba ta registrando, e virus tey toch. Miho preveni cu lamenta.
Y hopi importante, ohala no surgi atrobe e tipo di vandalismo cu ta cende candela den terenonan habri sin construccion ni un pida muraya, djis pa smak. Añanan anterior den algun bario, bisiñanan mester a sali cu hemchi awa pa paga candela cu hendenan desconoci pa nan, a cende den un of otro tereno banda di nan cas.
Ohala lo tin trankilidad den tur bario, y tambe pa Cuerpo di Bombero cu, excepto aña pasa cu no tabata tin mucho movecion debi na cendemento di candela, añanan prome por corda cu nan tabata man full yen pa motibo di candelanan peligroso, door di vandalismo.
