ORANJESTAD (AAN) -- Hopi pais rond mundo ta celebra e nacemento di San Juan Bautista, riba dia 24 di Mei.
Na Latinoamerica, Spaña y algun otro pais di Europa, manera den e Reino Uni, e fiesta di San Juan tambe ta wordo celebra cu tradicionnan diferente.
Na Latinoamerica e festividad ta conoci como Dia di San Juan, y na Spaña como “E anochi di San Juan” cu ta cuminza dia 23 di Juni te su madruga di Dia 24, basa riba Bijbel cu ta conta cu San Juan Bautista a nace dia 24 di Juni. Segun e textonan sagrado Zacarias a manda cende un candela riba palo y mondi (hoguera) pa vocifera e nacemento di su yiu Juan.
Cristianismo a bin asimila e tradicion di origen pagano, y a pone e fecha riba calender y pa tal motivo e custumber di cende candela den forma di hoguera, a keda asocia na e nacemento di Juan “E Bautista”.
E tradicion aki a keda mantene te awendia sea como e Anochi di San Juan of Dia di San Juan, manera ta conoci den paisnan di Centro y Sudamerica, unda tur esnan naci riba dia 24 di Juni y cu a wordo batiza sea Juan of Juana ta celebra nan hacimento di aña y Dia di nan Santo pareu.
Na Centroamerica, por ehemplo, tin provincia y tambe distrito cu ta hiba e nomber “San Juan” den e distinto paisnan di e Istmo. Eynan ta wordo celebra e asina yama “Fiesta Patronal” cu ta wordo realiza den e plaza situa dilanti di e Misa di San Juan y nan ta realiza weganan diverso, kiosconan bao tent, unda ta bende cuminda y bebida tipico di e lugar, un sorto di “feria” pa mucha y adulto.
Durante e dia diferente grupo musical ta bin toca, pa alegra e ambiente. Tur esaki ta cuminza despues di e Santo Sacrificio di Misa trempan mainta. Pues, e ta coincidi cu Aruba den cendemento di candela si, pero no pa kima sushi, ni tin deramento di gai. Cada tradicion ta sumamente bunita, y sigur esun di Aruba ta diferente y unico.
