Ta desmenti cu detencion di Ministro Glenbert di haber cu eleccion na caminda

Razzia mainta trempan na cas di Ministro

• Ministro y su casa lo ta meti den caso Portulaca
• Razzia y detencion a obliga Glenbert tuma retiro 

ORANJESTAD (AAN): Diamars mainta, habitantenan di un zona residencial na Bubali a bin mira cu diripiente un cantidad di unidad Policial y di LandsRecherche a aglomera di sorpresa dilanti un cas.

   A resulta cu bao di supervision di Ministerio Publico, a tuma lugar un razzia na cas di Ministro di Labor, Energia, y Integracion, esta Glenbert Croes.  E accion aki a bira realidad, despues di un investigacion di varios documento y prueba riba diferente hard-disk portatil, a bin descubri cu tanto Ministro Glenbert Croes y su esposa ta envolvi den actonan serio den cuadro di e ‘Caso Portulaca’ cu a bira conoci cinco luna pasa na luna di Juni 2024.

   Durante e razzia, oficialnan di LandsRecherche a detene tanto Ministro Glenbert Croes, y tambe su casa.  A dune chens pa yama su abogado, esta mr. Vito Carlo kende a yega eynan, reforza pa abogado mr. Illes tambe.

  Ademas di aresto, oficialnan di LandsRecherche a listra henter e cas enbusca di mas documento, hard-disk, laptop computers, of hasta USB Memory Sticks pa bay analisa nan tur.  E listramento aki a wordo confirma door di Procurador General Amalin Flanegin mes, den un declaracion haci na prensa.

   Procurador General Flanegin a splica cu e detencion ta den cuadro di e Caso Portulaca. Esaki ta un investigacion cu ta andando algun  tempo caba di LandsRecherche bao di guia di Ministerio Publico.

   Data a cuminsa duna un imagen: E investigacion aki ta entre otro dirigi riba e sospecho di delitonan encuanto dunamento di permisonan di estadia/trabao entre 2020 te cu awor.

   Anteriormente, dia 4 di juni 2024 den e mesun investigacion Portulaca, detencionnan tambe a tuma lugar caba. E tempo ey tambe listramento den diferente cas y edificionan commercial a sosode y confiscacion di obhetonan a tuma lugar.  Via di investigacion haci despues cu tur documento y data di computer confisca, e sospecho contra e Minister a surgi.

   Casi a isola Glenbert: Segun Procurador, den e caso di Diamars mainta, Ministerio Publico a aplica riba e sospechoso restriccionnan den interes di e investigacion. Esaki kier meen cu e dianan aki, Glenbert como sospechoso por tin contacto solamente cu su abogado y cu ningun otro hende mas.  Esaki ta entre otro e motibo, pakico Ministerio Publico ta cauteloso cu dunamento di mas informacion encuanto e contenido di e caso aki.

   Nada di haber cu eleccion: Pero loke Procurador Flanegin si a agrega ta lo siguiente:  “Esaki, encuanto e momento cu e detencion di e sospechoso a tuma lugar. Sucesonan politico nunca ta influencia curso di un investigacion penal,” el a bisa.  Den mesun rosea el a agrega: “Aworaki tampoco.”

   Ministerio Publico y LandsRecherche ta mantene den investigacionnan penal na nan propio planificacion y planning. Loke descubri durante e investigacion frecuentemente ta determina e momento di detencion di un sospechoso y e ehecucion di listramentonan den cas.

    Por lo tanto, cu e detencion te awor, tin di haber cu e momento den cual e sospecha contra e minister a surgi, e planning/planificacion di LandsRecherche, Huez Comisario y Ministerio Publico. Y tur esaki no ta diferente fe loke ta usual den otro investigacion.

   Cu gobierno a cay dia 9 di september y cu despues eleccion a worde yama, por lo tanto no a influencia e planning/planificacion aki.

   Segun Procurador General, e investigacion penal ta sigui. No ta exclui cu mas detencion lo por tuma lugar den e caso aki. Den interes di e investigacion cu ainda ta andando, Ministerio Publico na e momento aki no ta duna mas informacion.