Ta calculando un cantidad di 14 pa 15 container di clapchi cu lo mester yega Aruba e aña aki

Rubin Ponson di DOW

* Tur cos ta mustra cu e containernan lo yega mas tempran 

ORANJESTAD (AAN):   DIARIO a tene un entrevista cu Rubin Ponson, specialista den explosivo di DOW, miembro di e comision di vuurwerk, relaciona cu e temporada di fin di aña y specificamente riba e benta di clapchi.

            Ponson a duna di conoce cu ya caba na cuminsamento di aña tabata tin un reunion caminda e comision di vuurwerk a sinta. A haci evaluacionnan di e aña anterior pa wak con ta bay prepara pa e aña aki.

            Te cu awor cada departamento ta haciendo nan trabaonan pa wak cu kico mester cumpli cu ne. Esaki ta algo cu ta bayendo bon pa loke ta concerni DOW, a bisa.

             A agrega cu DOW ta bezig ta hayando informacion di e containernan cu ta na caminda pa asina prepara pa ora nan yega por pone nan riba tereno di WELA y pa cuminsa haci e trabaonan cu mester haci prome cu e benta.

            Rubin Ponson a laga sa cu e aña aki tin clapchi atrobe di e aña anterior. Ta sperando un cantidad di container mescos cu e añanan anterior. E cantidad no a bira menos. Ta calculando un cantidad di 14 pa 15 container cu lo mester yega Aruba. Tin chens cu un of dos mas por bin, pero tambe tin un dos mas cu por keda afo. Pero a cantidad exacto ta bay haya te ora cu e barconan ta casi den nan ruta pa Aruba.

            E peticionnan haci ta mescos cu e añanan anterior. Nan ta prepara pa locual ta e departamentonan, DOW ora cu nan ta ricibi e clapchinan aki nan ta yama e otro departamentonan manera Aduana, pa haci control.

            Segun Ponson, e parti bon pa e aña aki ta cu tur cos ta mustra cu e containernan lo yega mas tempran, cu por tin nan na tempo pa por haci e trabaonan riba un tempo mas largo, mas trankilo y cu nan ta por ta sigur, cu e seguridad lo hunga un rol importante pa por garantisa esaki.