Ta bay duna lezing tocante diabetes na muchanan den cuadro di Dia Mundial di Diabetes

Jasmira Mora, POH Coordinator na Wit Wele Kruis:

 *Edad cu malesa ta presenta a baha 

ORANJESTAD (AAN):  Dia 14 di November ta Dia Mundial di Diabetes y manera custumber e Praktijk Ondersteuners Huisartsenzorg (POH), semper ta haci un actividad riba e dia aki.

            Jasmira Mora, Coordinador di POH na Wit Gele Kruis a splica cu durante transcurso di añanan semper e POH ta haci diferente chekeo pa duna pueblo e oportunidad pa bay haci nan chekeo di sucu, presion, colesterol gratis.

            Pero e aña aki, a indica, kier enfoca mas riba e tema cu 'International World Federation' ta haciendo cual ta pone enfoke riba educacion. Cu esey na mente, e aña aki a dicidi di na lugar di bay haci e 'check-up' pa bay duna lezing na muchanan entre 5de cu 6de klas na e diferente Tra'imerdianan. Esaki pa nan ta algo hopi importante pasobra ta ripara cu cada biaha e edad cu e muchanan ta hayando diabetes ta birando hopi mas jong.

            E mihor manera ta pa cuminsa di tempran cerca e muchanan.   A scoge 5de y 6de klas pasobra na e edad aki e muchanan tin un tiki conocimento tambe di e curpa y nan por compronde un tiki mas mihor kico ta locual cu ta bay splica, Jasmira Mora a señala. Tambe ta importante pa e muchanan tin un bos y te hasta pa guia nan mayornan riba kico nan a siña na scol y loke nan kier practica na cas.

            P'e motibo aki a tuma contacto cu Bureau Tra'imerdia. Nan tin 7 centro y ta bay ta presente henter siman di 14 te cu 18 di November bay na diferente Tra'imerdia. Ademas di e 7 tra'imerdianan aki, den colaboracion cu Fundacion Diabetico Aruba lo ta presente na dos diferente otro scol; Cacique Macuarima y Sint Dominicus College, a bisa.

            El a menciona tambe cu e presentacionnan aki ta bin for di IDF Kids Program. Ta importante pa no solamente enfoca riba e muchanan, pero tambe riba e maestronan y mayornan. Esaki ta e prome stap pa por sigui cu e proyecto aki den e transcurso di e añanan.

            E meta ta pa bay tambe na tur e scolnan basico y asina crece den e educacion pa e muchanan relaciona cu e tema aki di diabetes tipo 1 y tipo 2.

            E POH's tambe ta bay ta presente na e 'Diabetes Walk & Run' manera tur aña unda ta purba di ta presente den mayoria di actividadnan cu tin pa cu diabetes ya cu esey ta locual e POH's ta haci. Den transcurso di e siman di 14 te cu 18 di November lo ripara cu diferente edificio na Aruba lo ta bay ta cu lus blauw y esaki lo ta den cuadro di Dia Mundial di Diabetes, Jasmira Mora a duna di conoce.