Ta bay construi un rotonde na e crusada peligroso na Palm Beach

Segun director interino di DOW, Jossy Kock - *Lo bin un solucion temporal mientras ta warda riba fondonan  

ORANJESTAD (AAN):  For di basta tempo e luznan di trafico di Palm Beach no ta den funcion y esaki a ocasiona varios accidente den trafico. Esaki a bira un crusada basta peligroso.

Tin baricada poni den e area y te hasta algun borchi pa alerta trafico, pero esaki parce no a duna e resultado desea.

A puntra director interino di Departamento di Obranan Publico (DOW), Ing. Jossy Kock riba kico e departamento tin den plan pa soluciona e situacion peligroso aki.

Kock a indica cu actualmente DOW ta analisando e crusada aki y tin un solucion caba p'e. Ta bay bin un rotonde eynan, pero ta wardando e fondonan pa por traha esaki. Tambe ta bezig ta wak otro opcion pa pone un solucion temporal eynan pa asina evita cu mas accidente ta tuma lugar.

El a agrega cu actualmente ta bezig cu e solucion temporal. Asina cu e diseño keda cla ta bay implement'e.

Pa loke ta e solucion temporal, segun Kock, DOW ta trahando cu nan tecniconan pa wak con por soluciona esey. Ta na e departamento pa bin cu un solucion temporalmente pa asina evita cu accidentenan ta sigui tuma lugar tur dia.