Ta bay asfalta algun caminda pa facilita e trabaonan di construccion di e rotonde na Palm Beach 

ORANJESTAD (AAN):   Director di Departamento di Obranan Publico (DOW), ing. Marlon Croes, a anuncia cu dialuna awor lo inicia e construccion di e rotonde na Palm Beach.

Pa esaki, lo dividi e trabao den dos fase. E prome fase lo inicia dialuna 7 di maart y lo caba na Juli.  E di dos fase lo inicia den e di dos mitad di Juli y lo sigui te cu e luna di September. Esaki ta bay ta e parti pariba di e crusada. E momento ey, mitad rotonde parti pabao lo ta cla.

Akinan e reto den trafico ta bira un tiki mas grandi, Ing. Croes a bisa.

E cambionan den trafico lo ta e siguiente: e trafico di Oranjestad direccion Malmok tin cu pasa e crusada di ex House of Cheng pa despues bay drenta den e bario di Gasparito, pa despues pasa den Keito y subi caminda pa bay direccion di Palm Beach, a indica.

Pa por haci e crusada mas safe y pa por duna otro chens pa por pasa, lo construi e weekend aki dos 'verkeers plateau'  pa por baha e velocidad den e area aki, Marlon Croes a splica.

E director di DOW a agrega cu e caminda cu den e prome fase ta wordo cambia pa bay zuid, den e fase dos ta cambi'e pa bay noord pa asina por sigui bay pa Malmok. E trafico di Malmok pa Oranjestad lo haci uzo di e mitad rotonde cu lo ta cla caba den e momento ey pa e sigui bay Playa.

  DOW ta bay asfalta algun caminda pa asina haci e fluho di trafico un tiki mas mihor durante e construccion di e rotonde. Ora di caba lo kita e parti cu no ta necesario mas, a indica.

Ora di caba e prome fase DOW lo yama un otro rueda di prensa pa informa comunidad du e cambionan cu ta bay tuma lugar pa cu e di dos fase, Marlon Croes a finalisa bisando.