Camilla Dammers y Rafael Perez di IBiSA:
ORANJESTAD (AAN) – Camilla Dammers Hefe di School Sport & Recreation na IBiSA, den conferencia di prensa a anuncia e di 43 edicion di Turibana Race cu ta un careda cu tin añanan caba ta tuma lugar y ta hopi conoci den e calender tambe, cu tur hende ta pendiente di dje.
E fecha pa e careda aki ta Diadomingo 10 di September, cuminzando pa 6’or na MFA Noord. Esey ta lugar unda ultimo añanan esaki a tuma lugar, Dammers a bisa.
E registracion a habri diahuebs 10 di Augustus, pues tin un luna pa registra, pero manera custumber e participante tin cu paga adelanta pa asegura su lugar. E careda tin tres diferente categoria: esun individual cu ta un distancia di 10 kilometer completo, pero tambe e distancia por wordo parti den dos persona.
Kiermen, tin dos categoria di relay (relevo): e open relay unda dos hende por competi hunto, sea dos hende muher, dos hende homber of un hende muher y un hende homber. Tambe tin un categoria nobo cu ta esun gubernamental, cu tambe ta mescos cu a caba di menciona.
Seguidamente, Rafael Perez, director di e careda, a tuma palabra pa amplia e informacion. Perez a informa cu e careda lo start pa 6’or di mainta. El a subraya cu pa 3’or di madruga lo ta cerando e caminda dilanti MFA na Noord, y esaki ta pa set up tur loke mester prepara na inicio di e careda. E ruta ta di 10.5 Kilometer (6.56 miles). E organizador ta IBiSA. E cantidad maximo di participante cu tin premira pa e aña aki ta 600 persona, di cual 400 ta individual y 100 tin duo cu a wordo parti den dos, cual ta e open relay team, cu ta consisti di duo di cabayero, duo di dama, y mix.
Perez a indica cu IBiSA pa promove deporte, salud y movecion, ta yuda hopi instancia pero e aña aki a pensa riba nan mes y nan coleganan y pesey a nace e duo relay gubernamental, cual cada un lo core 5.25 kilometer. El a haci un invitacion, encarecidamente, na tur ambtenaar, esnan cu ta traha den diferente ministerio, stichtingnan y NV’s estatal pa participa. Na September mester tene cuenta cu e temperatura; e ruta ta bay tin cuater water-post, y ta aconseha tur persona cu lo participa pa hidrata nan mes bon, y ta bay tin shower na final di e careda pa fresca curpa.
Premiacion lo ta e trofeo, y tur ganador di prome, di dos y di tres lugar, lo ricibi un trofeo y entrega di e premio lo sosode mesora despues di e careda, na MFA Noord mes. Tin un tempo limite di 2 ora y mey. Pues pa 8.30 nan mester ta aden pa seguridad di nan tur.
Finalmente, Rafael Perez a haci un suplica pa tur habitante y automobilista cu ta core rond den e ruta, pa tene cuenta cu tin hende ta trahando, polis riba caminda, motor union, empleadonan di IBiSA, y boluntarionan.
