Minister Endy Croes a reuni cu OAA:
ORANJESTAD (AAN): Dia 3 di januari ultimo, Minister Endy Croes a reuni cu Sr. Carlos Martinus cu ta na cabes di Openbare Avondleergangen Aruba (OAA).
Durante e reunion a trata diferente punto di interes pa cu mehoracion di OAA y e vision pa cu aña 2024. OAA oficialmente ta resorta bou di Dienst Publieke Scholen (DPS).
Sr. Martinus a remarca cu e scol tin mester di zorg na OAA, unda cu a propone pa un SMW’er por duna asistencia di cuater (4) ora pa siman.
Fuera di esaki, Sr. Martinus ta representando Ministerio di Enseñansa den e comision cu ta analisando SPO y den luna di februari Minister Endy Croes lo ricibi un conseho riba esaki. Actualmente, e comision ta analisando si SPO ta keda tres aña of SPO ta bira cinco aña di estudio. Den luna di februari proximo Minister Endy Croes lo ricibi e conseho final.
Minister Endy Croes a indica cu tur cos ta mustra den e direccion cu SPO lo bay amplia en bes di tres aña pa cinco aña. Asina cu tur cos bira cla y si esaki ta e conseho lo cuminsa cu un campaña di conscientisacion, lo acerca e mayornan y lo traha un draaiboek.
Ademas di esaki, Sr. Martinus a haci peticion pa cinco “entree opleiding” nobo pa OAA. Mester enfatisa cu OAA ta creciendo di 70 studiante pa casi 170 studiante.
Pa finalisa, Minister Endy Croes a expresa cu e tabata un bon reunion hopi amplio unda a trata diferente tema relaciona cu Enseñansa.
Alabes Minister Endy Croes ta desea Sr. Carlos Martinus hopi exito tanto cu OAA y e comisionnan cu e ta representa Ministerio di Enseñansa.
