SVb su mensahe riba Dia Mundial di Curason

Empleadonan cu curason saludabel ta preveni Ataca di Curason 

ORANJESTAD (AAN): Preveni  empleadonan pa haya un ataca di curason of un stroke na pia di trabao por ta un meta pa un dunador di trabao. Esaki pasobra e dos condicionnan di salud aki ta bay man den man y ta relaciona cu otro condicionnan di salud cu hopi biaha nos no ta tene cuenta suficientemente cu nan.

            Presion halto, cholesterol halto y huma combina cu sobrepeso of obesidad ta factornan di riesgo pa desaroya malesanan di curason. Si nos tene na cuenta cu 79% ta e suma di 43% di sobrepeso y 36% di obesidad  por conclui cu Aruba su población ta hopi pisa. Na Aruba 4 di cada 5 persona riba 20 aña tin sobrepeso

            Otro condicionnan y e escogencia di un estilo di bida menos saludabel tambe ta aumenta e riesgo di malesanan cardiovascular ”CVD” aki nos ta referi na diabetes, malnutricion, mucho consumo di salo, poco actividad fisico y demasiado consumo di alcohol. Esakinan tambe ta contribui grandemente na malesanan cardiovascular.

            Ambientenan di trabao ta lugarnan na unda facilmente por mehora e salud di curason. E chens pa desaroya malesanan cardiovascular ta di 50%  na edad di 45 aña cu ta representa un porcion significativo di e forsa laboral. Pesey ta importante pa e doño di trabao implementa maneho di salud na pia di trabao.

Algun programa cu por traha riba dje ta:

- Provee cuminda y bebidanan saludabel pa reunionnan y encuentronan di trabao,

- Permiti tempo flexibel pa actividad fisico prome of despues di ora di trabao.

- Provee monitornan pa test presion halto na pia di trabao.

- Incentiva empleadonan pa uza trapi usando pinturanan y competencia rondo di esaki.

- Ofrece benta di snacks y bebidanan saludabel y controla esakinan.

- Organisa control di factornan di riesgo na pia di trabao pa tur empleado.

- Organisa caminatanan cu empleadonan despues di trabao semanalmente.

- Implementa desafionan di actividad fisico y competencia entre empleadonan.

- Contribui y/of provee descuentonan pa gym/programanan di fitness pa esnan interesa.

- Organisa actividadnan cu ta reta empleadonan produci recetanan saludabel

            Promocion di salud na pia di trabao no mester costa hopi. E doño di trabao cu su creatividad y e disponibilidad di e trahado pa mehora su condicion di salud ta e base pa logra hopi den prevencion.            Organisacionnan local cu ta traha na beneficio di salud den nos comunidad semper ta dispuesto pa informa y duna guia banda di esaki nan tin hopi material di informacion disponibel. Di parti di SVb nos ta uni na e mensahe di Federacion Mundial Curason y ta invitabo pa “Uza bo curason, pa preveni malesa di curason”.