Segun Directora di DIMP
ORANJESTAD (AAN): Directora di Departamento di Impuesto (DIMP), señora Luenne Gomez-Pieters a duna di conoce cu banda di entradanan di impuestonan di DIMP pa caha di gobierno, e departamento ta cobra primanan di seguronan social cu a conoce aumento pa aña 2025. SVb a conoce aumento di 22.2 miyon Florin, cu un total di 392.9 miyon Florin na entrada. AZV a conoce aumento di 18.5 miyon Florin, cu un suma di 315 miyon Florin na entrada.
Segun Directora di DIMP, Director di e departamentonan di seguro social, señor Edwin Jacobs a expresa cu nan ta contento cu e sumanan aki y e aumento cu a conoce den ambos departamento. Na final, esakinan ta sigura pensioennan y seguro medico.
Pa loke ta trata Aruba Tourism Authority (ATA), señora Gomez-Pieters a indica cu tambe a conoce aumento di entrada di 12.3 miyon Florin extra compara cu añanan anterior. E suma total ta 130.9 miyon Florin.
“Esakinan ta cobransanan cu DIMP ta haci ‘namens derden’ y tur a conoce aumento pa aña 2025. E aumentonan aki ta aumentonan cu ta un combinacion di e avanse economico. Sector turistico ta bayendo dilanti unda a conoce diferente desaroyo riba e tereno aki. Esaki ta refleha riba cobransanan di impuesto” señora Gomez-Pieters a duna di conoce
Pero sigur tambe, el a expresa, un factor importante pa e aumentonan aki, ta e eficiencia di Departamento di Impuesto pa haci e cobransanan aki tanto pa DIMP mes como pa e otro departamentonan cu tambe a conoce aumento.
