Presidente di Parlamento encuanto crisis mundial
ORANJESTAD (AAN): Presidente di Parlamento Marlon Sneek a duna di conoce cu diferente reunionnan lo wordo yama den e proximo dianan nos dilanti. El a enfatisa cu ora peticionnan pa reunionnan drenta, ta coresponde cu e ministernan concerni pa asina pone reunionnan riba agenda di Parlamento segun disponibilidad di e ministernan concerni y e tempo di preparacionnan cu nan tin mester.
Segun el a indica, awo tin mas conocemento ki tur ta e efectonan y kico tur lo bay tuma luga como consecuencia di e guera. Entre otro, mundialmente prijsnan di crudo a cuminsa subi y prijs di gasolin a subi na Aruba.
Presidente di Parlamento a duna di conoce cu Minister di Economia y Finansa Geoffrey Wever ta trahando riba su pakete di accion, cu e lo presenta proximante na Parlamento. Segun Sneek, e minister a pidi tempo pa haci investigacionnan riba e impacto cu e guera lo tin mundialmente y pa nos, pa asina e hinca un plan real den otro basa riba e impactonan, anuncionan cu ta tuma luga, teniendo cuenta entre otro cu subida di prijs di transporte y di gasoline, pa asina mitiga e diferente scenarionan aki.
“Den principio, e minister lo bin Parlamento pa duna un relato di kico e scenarionan ta, kico Banco Central y Departamento di Economia ta pronostica. ATA tambe ta na mesa pa e parti turistico pa asina tin un pakete total pa asina pos sa con pa atende loke ta tumando luga mundiamente”, Presidente di Parlamento a duna di conoce.
