WILLEMSTAD: Den un ambiente ameno na CUR Airport, a tuma luga celebracion di e buelo directo nobo di Surinam Airways conectando Miami y Curaçao.
E schedule ta inclui 3 buelo semanal riba Dialuna, Diaranson y Diabierna. E buelonan lo ta cu un Boeing 737-800 cu un capacidad di 150 stul. Na yegada di e prome buelo na aeropuerto, e avion a wordo ricibi cu e tradicional saludo di cañon di awa.
Durante e ceremonia a hiba palabra Minister di Desaroyo Economico, Ruisandro Cijntje, tambe Minister di Trafico y Transporte, Charles Cooper, sr. Gonesh Steven, CEO di Surinam Airways y sr. Jonny Andersen, CEO di CAP. Despues Minister Cijntje, Minister Cooper y sr. Muryad de Bruin (CTB), hunto cu señora Christa Zuiverloon, Consul General di Suriname y sr. Andersen (CAP) a haci entrega di un plaquette conmemorativo na Surinam Airways.
Curaçao ya tin un relashon di basta aña cu Surinam Airways, e aerolinea ta ehecutando buelonan directo for di Paramaribo pa Curacao. E aerolinea awor a amplia su schedule di buelo, introduciendo buelonan directo for di Miami pa Curaçao.
Introduccion di e buelo directo di Surinam Airways no solamente ta aumenta e opcionnan di biahe pa e bishitantenan for di exterior pero na mes momento e ta brinda tambe mas opcion di biahe pa pasaheronan local.
