ORANJESTAD (AAN): Varios ciudadano a reacciona hopi positivo mes cu Bureau City Inspector a cuminza bek cu e accion di kita autonan bieu for di riba caminda publico, of for di den mondi.
E accion a start prome na San Nicolas, y despues a sigui pa Savaneta. Tur e bista mahos ta bay cuminza wordo elimina for di varios skina di e isla, y poco-poco lo sigui bay pa e resto di isla.
Den fin di siman, un ciudadano a contact DIARIO pa mustra su admiracion pa City Inspector cu nan accion. Pero toch e ta kere cu prome cu nan sigui cu e demas distritonan uno-pa-uno, e ta sugeri pa Bureau City Inspector haci un ‘sweep’ di e lugarnan principal unda turistanan ta pasa prome.
Pasobra e mes ta tende hopi comentario encuanto e “bista” bergonzoso cu turistanan ta haya asina cu nan a caba di touch-down na Aruba. E ta referi na skelet di autonan cu tin banda di caminda riba Watty Vos Boulevard, den area di Paperclip Rotonde na Sero Patrishi.
Pa colmo, e skeletnan di auto aki ta cerca di caminda grandi. E ciudadano ta puntra su mes, si acaso City Inspector sa pasa riba Watty Vos Boulevard y mira esaki, of kizas e funcionarionan nan ‘mente’ ta otro caminda y no ta mira e situacion aki.
E ciudadano mes a suministra dos potret, y e ta spera sinceramente cu algo wordo haci. Pasobra desde cu Watty Vos Boulevard a habri, esey ta e caminda principal cu Taxistanan ta usa pa transporta turistanan for di Aeropuerto pa Highrise Hotelnan.
