Supervisornan ta participando den tayer ofreci pa AHATA

Den colaboracion cu CHTA Education Foundation

ORANJESTAD (AAN): Durante e luna di October, supervisornan rond di Aruba ta elevando nan abilidadnan di supervision cu un bootcamp nobo di CHTA Education Foundation cu ta ser ofreci pa Aruba Hotel & Tourism Association (AHATA).

            E bootcamp di dos dia ta diseña specificamente pa lidernan di team den e sector di hospitalidad y 140 participante a registra pa tuma e curso entre October 9 y 26. E demanda pa e entrenamento tabata evidente ya cu e la sold out den poco siman.

            Supervisornan y nan gerentenan ta siñando con pa mehora nan abilidadnan pa supervisa nan team, pa asina aumenta satisfaccion di huespednan y di nan team mes. E entrenamento ta wordo presenta pa Louise John y Suzanne Shillingford-Brooks di Talkabout & Earth Solutions, e facilitadonan pa Education Foundation.

            "Nos ta hopi emociona di ta bek na Aruba," a indica Karolin Troubetzkoy, Chairwoman di Education Foundation. "E bootcamp aki ta brinda sosten na supervisornan y nan gerentenan pa representa e calidad di atencion cu e industria di turismo den Caribe ta conoci pe y cu nos programa di entrenamento ta mehora."

            "Servicio extraordinario ta e pilar di e exito di Aruba su industria turistico, y e meta di AHATA ta pa yuda sigura nos liderazgo den e mercado door di apoya e desaroyo di personal den hospitalidad.” Ta great pa wak asina hopi interes pa e excelente entrenamento di CHTAEF y con 140 supervisor ta enrikeciendo nan abilidadnan", a comparti Presidente y CEO di AHATA, Tisa LaSorte.