Suma di Bijstand pa personanan cu limitacion ta subi cu 130 florin pa luna  

Anuncia pa Ministro Rocco Tjon

 *Lo paga na september, cu juli y augustus retroactivo 

ORANJESTAD (AAN) Dialuna mainta den conferencia di prensa di Gobierno, Minister di Husticia y Asunto Social, señor Rocco Tjon, a duna informacion a duna un update pa loke ta e proceso di profesionalisacion di Arumil, con esaki ta canando.

             Pero prome cu drenta den e tema aki, e dignatario a haci un anuncio hopi importante, y esaki ta cu gobierno ta bay aumenta e bijstand, pa personanan cu limitacion.

             “T’asina aki cu danki na e bon maneho financiero cu ta wordo hiba, esaki ta crea espacio pa gobierno por a tuma diferente decision na bienestar di diferente gruponan di nos comunidad. Entre otro, e pensionadonan, e ambtenaarnan cu a haya nan indexering, e personanan cu ta traha den fundacionnan cu tambe a haya nan indexering.

            Y obviamente, nos a tene cuenta tambe cu e grupo aki, cu ta e personanan cu limitacion”, Minister Rocco Tjon a duna di conoce.

            E mandatario a indica cu si wak e historia di bijstand pa personanan cu limitacion ta na tres ocasion si esaki a conoce un aumento. E  prome tabata na 2024, e siguiente tabata na 2007, y e ultimo tabata 11 aña pasa.

            “Mi ta sumamente contento y satisfecho di por anuncia awe cu for di entrante 1 di juli 2024, e personanan cu ta ricibi e bijstand aki tambe lo conoce un aumento di 130 florin pa luna. Pues, e suma total nobo ta bay bira Afl. 1.080 pa luna. Y ta importante tambe pa splica cu e suma nobo ta bay wordo paga den e pago di september cu forza retroactivo te cu juli 2024”, Minister Rocco Tjon, titular di Husticia y Asunto Social a declara.

            Pues, e personanan cu lo haya nan bijstand na September, lo ricibi e suma nobo di Afl. 1.080  y alavez aumento di Juli y Augustus pa locual ta trata e Afl. 130. “Unbes mas, mi ta kere cu ta un paso importante cu mi ta kere a wordo tuma, y tambe ta yuda e grupo aki”, Minister Rocco Tjon a reitera.