A aproba e payroll di mas grandi den SVb
*Ademas ta paga 1,6 miyon na prima di AZV pa e pensionadonan
ORANJESTAD (AAN): Edwin Jacobs a duna di conoce cu el aproba e payroll di mas grandi den SVb. Dia 29 di november SVb ta pagando e pensioennan mas un bonus di fin di aña di 75%. Esaki ta totalisa e suma di 37,9 miyon florin na pensioen di behes y 4,0 miyon na reparatietoeslag.
Ademas, ta paga 1,6 miyon na prima di AZV pa e pensionadonan. E suma aki ta destina pa 22.703 pensionado, cual 19.876 ta bibando na Aruba. E top 3 di paisnan unda pensionadonan ta biba pafor di Aruba ta:
- Hulanda (1.492)
- Colombia (263)
- Merca (200)
Pa e luna di december a drenta e sistema 72 pensionado nobo, mientras 42 pensionado a fayece.
Un dato interesante ta e desaroyo den e tasa di mortalidad bao e pensionadonan di SVb. Na 2014, di cada 1.000 pensionado riba 65 aña, 34,9 a fayece.
Cinco aña despues e cifra aki tabata na 33,3 fayecido pa cada 1.000 pensionado riba 65 aña.
Mientras cu na 2023, di cada 1.000 pensionado a fayece 31,0. Esaki ta un reduccion remarcabel y ta contradeci e percepcion cu ta keda crea cu nos adultonan mayor ta fayeciendo awo mas cu antes.
Cifranan di SVb ta mustra cu mas ciudadano ta yegando edadnan halto y esaki ta un indicador di cierto desaroyonan positivo den diferente area riba nos isla.
E pension di behes ta hunga un papel importante pa nos grandinan y ta nos deber pa percura pa esaki keda uno sostenibel, Jacobs a indica.
