ORANJESTAD (AAN): Diaranson na Horacio Oduber Hospital a tuma lugar firmamento, pa locual ta bay ta un asina yama Hyperbaric Oxygen Chamber,
cu ta un aparato special pa duna tratamento na pashentnan cu tin problema di pulmon.
Minister di Salubridad Publico Dangui Oduber a hiba palabra durante un conferencia di prensa y a bisa cu e ta hopi contento cu Hospital ta bay inverti den e Hyperbaric Chamber.
“Pa hopi aña e deseo tabata tey pa cumpra e aparato, pero debi na espacio financiero limita, esaki no tabata posibel”.
Esaki a traduci su mes den un mihor situacion financiero pa AZVy asina a logra haci inversionnan continuo den cuido, segun Oduber.
Despues di combersacionnan cu docter Yuri Caceres y cu raad van bestuur di hospital, a dicidi di haci e inversion den e Hyperbaric Chamber (H-Box), pasobra esaki lo beneficia no solamente pashentnan cu heridanan, sino tambe pa divers cu ta scoge Aruba como nan destinacion.
Miembro di directiva di hospital Gregory Croeze tambe a hiba palabra y a trece dilanti cu hospital su vision ta pa tin cuido accesible y pagable pa tur hende, cu calidad halto.
Algun aña pasa a cuminza papa di e Hyperbaric Oxygen Chamber, pensando tambe riba unda lo pone e aparato y con e ta bay wordo uza.
Porfin e ta bay bira un realidad y pesey mi kier gradici director Jacco Vroegop, pasobra e tabata esun cu a sigui pusha pa haya tur stakeholder abordo di e proyecto, segun Croeze.
Vroegop mes a gradici tur hende cu a contribui na e bunita proyecto, incluyendo sponsor ATA.
E director a indica cu for di algun tempo tabata obvio cu hospital tabata falta un Hyperbaric Chamber, cu ta hopi importante sigur tambe pa personanan cu ta dive.
Pa cuido di herida tambe e ta bay ta hopi importante.
Director di AZV Edwin Jacobs durante e conferencia di prensa a indica cu sigur ta importante pa Aruba tin cuido medico accesibel pa tur, di calidad, pagable y eficiente.
El a indica cu e proyecto aki sin duda lo contribui na calidad di cuido y e ta bay tin un impacto riba salud y bida di nos hendenan.
Docter Caceres di su banda a trece dilanti cu como esun na cabez di e asina yama Wondenpoli, e ta wak e Chamber aki como hopi importante pa yuda entre otro hendenan cu pia diabetico of heridanan cronico.
